Diretór Nasionál Empregu Esteriór Sekretaria Estadu Formasaun profesionál no Empregu, Filomeno Soares. Imajen/espesiál

DILI, 24 marsu 2020 (TATOLI) – Diretór Nasionál Empregu Esteriór Sekretaria Estadu Formasaun profesionál no Empregu (SEPFOPE), Filomeno Soares, informa katak traballadór timoroan ne’ebé servisu iha Austrália sei filafali ba Timor-Leste iha kuarta (24/03) tanba  sira ninia kontratu ramata ona.

“Ohin Ha’u simu lista husi traballadór na’in-20 ne’ebé servisu iha Austrália atu fila mai tanba sira ninia kontratu ramata ona. Loloos sira atu fila mai Timór ohin loron maibé tanba aviaun laiha entaun sira toba iha Darwin no aban mak sira mai”, dehan Diretór ne’e ba Agência Tatoli, via telefónika, tersa ne’e.

Diretór Filomeno adianta, traballadór na’in-20 servisu hanesan Seasonal Worker Programme, iha empreza ida naran Madek Brisbane, iha Brisbane, Austrália.

Tuir nia, traballadór sira nia kontratu hotu ona no sira lakohi kontinua servisu hodi fila kleur, tanba ne’e sira deside fila.

“Ami nu’udar parte husi Governu ne’ebé haruka ami no sei halo akompañamentu, tanba ne’e ami koordena ho parte imigrasaun hodi submete naran ba imigrasaun aeroportu no bainhira fila tenke tama kuarentina durante loron 14, ne’ebé Governu deside ona relasiona ho COVID-19”, nia subliña.

Diretór ne’e informa tan,  traballadór na’in-20 sei to’o Timor-Leste iha aban dadersan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here