Eis Primeiru-Ministru, Kay Rala Xanana Gusmão, fó hela orientasaun ba Polísia hodi asegura seguransa iha fatin kuarentena ne’ebé estabelese ona. Imajen/Eugénio Pereira

DILI, 23 marsu 2020 (TATOLI) – Lider Karizmátiku, Kay Rala Xanana Gusmão, husu ba Komandu Polísia Nasionál Timor-Leste (PNTL) hodi fó seguransa másimu ba Timoroan ne’ebé submete ba kuarentena.

Notísia Relevante : Prevene COVID-19, Xanana Kontaktu Governu Xina Ajuda Ekipamentu ho Médiku

“Polísia tenke asegura ita-nia Timoroan sira ne’e para sira bele hela ho kalma atu labele mosu problema, tanba sira mai hela iha ne’e mós la sala, tanba governu maka haruka mai para prevene aan hosi pandemia Coronavirus (COVID-19),” afirma Xanana Gusmão, hodi lia-tun ba Komandante Operasaun Nasionál PNTL, Superintendente Xefe Pedro Belo ho Komandante Munisípiu Dili, Superintendente Xefe Armando Monteiro, ohin, bainhira hala’o vizita ba fatin kuarentena Otél Audian, Dili.

Xanana husu polísia mantein seguransa iha fatin kuarentena sira-ne’e relasiona mós ho asaun protesta hosi komunidade  iha Tibar, Caicoli no Audian, ne’ebé la-simu atu sira-nia bairru sai fatin kuarentena ba COVID-19.

Xanana esplika, Timoroan sira-ne’e foin fila husi rai li’ur tenke hela duni iha fatin kuarentena para ekipa médiku observa sira-nia kondisaun saúde too loron 14 bainhira lai ha sintoma COVID-19 foin sira fila ba hasoru sira-nia família.

“Ha’u husu mós ba xefe suku no xefe aldeia sira, ita koopera ba haree imi nia joven sira maka tuda uma sira ne’e hotu, polisia iha sei fó kuarentena ketak ida ba sira,” Xanana afirma.

Xanana husu ba komunidade kapitál Dili atu labele halo diskriminasaun ba Timoroan sira ne’ebé hela iha kuarentena. Tanba sira hela iha otél hodi médiku kontrola sira-nia saúde hodi evita moras labele hada’et fali ba família no sosiedade sira.

“Ita labele hirus malu no hirus fali ita nia família sira, família mós sira lalika pániku tanba sira hela iha ne’e too rekupera mak fila,” nia hateten.

Parte seluk, Xanana apela otél sira iha kapitál Dili atu oferese mós fatin ba Timoroan sira hodi hela, tanba fatin ne’ebé governu prepara ona komesa nakonu.

Xefe Suku Santa Krús, Marciano Juvinal dehan, sira-nia parte prontu koopera, maibé husu ba governu tuir loloos antes lori Timoroan sira-ne’e ba hela iha Otél Audian tenke koordena ho autoridade lokál para hatene hodi kontrola joven sira labele kria konflitu.

“Ita kolabora para atu halo di’ak ba ema hotu-hotu nia saúde, maibé primeiru maka tenke iha liña koordenasaun hosi governu para ita bele fó informasaun,” Xefe Sulu Marciano Juvinal hateten.

Biban ne’e, Komandante PNTL Munisípiu Dili, Superintendente Xefe, Armando Monteiro deklara, polísia kolokadu ona hodi asegura fatin sira ne’ebé harii ona kuarentena no asegura mós seguransa makaas iha fatin izolamentu Sentru Saúde Vere Krús, Caicoli, Dili.

Armando hatutan, PNTL mós koopera ona ho populasaun no Autoridade Suku Caicoli, Santa Krús, Metiaut no Tibar hodi asegura situasaun seguransa.

Komandante Armando mós rekoñese iha área Tibar, Metiaut no Aduian, dezde horiseik lokraik too kalan joven balun tenta halo blokeia no tuda otél sira ne’e, maibé parte PNTL konsege akalma sitasaun.

Tuir observasaun Ajénsia Tatoli nota katak, daudaun ne’e parte polísia taka metin ona estrada iha Sentru Saúde Vera Krús hodi bandu kualkér sidadaun liu iha area ne’ebá  hodi fó oportunidade ba Ekipa Médiku COVID-19 kompostu Ministériu Saúde no Organizasaun Mundiál Saúde  (OMS) fó tratamentu ba suspeitu COVID-19.

Jornalista : Eugénio Pereira

Editór       : Francisco Simões