Otél Novo Horizonte, Dili. Imajen Tatoli/Cipriano Colo.

DILI, 22 marsu 2020 (TATOLI)–Timoroan na’in 12, kompostu husi mane na’in-sanulu no feto na’in-rua, ne’ebé ohin foin filahikas husi Austrália ho aviaun Air North, tuku 16:20 otl, oras ne’e daudaun tama iha fatin kuarentena, otél Novo Horizonte, Metiaut, Dili. 

Maski la hatene timoroan hirak-ne’e hanesan traballadór ba programa seasonal workers ka lae, maibé, Diretora Nasionál Kontrolu Doensa hosi Ministériu Saúde, Josefina Clarinha João, hateten oras ne’e daudaun sidadaun hirak-ne’e iha hela otél Novo Horizonte atu hala’o kuarentena durante loron 14.

“Timoroan sira ne’ebé ohin mai-husi Austrália ho aviaun Air North hamutuk na’in-12, maibé, sira-ne’e traballadór ka la’e ha’u la hatene, maibé sira mesak timoroan hotu. Sidadaun hirak-ne’e bainhira tun husi aviaun, ita transporta diretamente ba otél Novo Horizonte”, Josefina hateten lia hirak-ne’e ba Agência Tatol via telefone, ohin.

Diretora ne’e informa katak númeru ne’ebé oras ne’e daudaun iha otél ne’e hamutuk na’in-90 resin ne’ebé mai-husi estranjeiru ohin, no tama ho aviaun husi aeroportu internasionál Prezidente Nicolau Lobato Dili.

Nia mós garante katak Governu mak sei prepara hahán ba sidadaun hirak-nee, durante loron sanulu-resin haat iha fatin kuarentena.

“Kuandu Governu mak prepara fatin ba kuarentena, klaru Governu rasik mak prepara hahán ba sidadaun hirak-ne’e durante iha fatin kuarentena”, nia reforsa.

Kona-ba fasilidade atubele deteta virus Corona, diretora ne’e garante mós katak fasilidade garantidu.

“Iha fatin kuarentena ami iha médiku no infermeiru atu halo servisu oinsá mak bele kontrola sidadaun hirak-ne’e ninia kondisaun loron-loron, komesa husi dadeer to’o loraik, no husi loraik to’o fali dadeer”, nia subliña.

Entretantu, observasaun jornalista TATOLI iha terrenu hatudu katak fatin kuarentena iha otél Novo Horizonte hetan seguransa másimu husi Polísia Nasionál Timor Leste.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here