Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 23 marsu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, apela ba jornalista sira hotu ne’ebé halo funsaun profisionál, tenke kontribui ba informasaun ne’ebé kredível nune’e labele halo pániku ba populasaun ligadu ho COVID-19.

“Ha’u husu ba jornalista sira tenke kontribui ba informasaun ne’ebé kredível nune’e kontinua hato’o ba povu hodi akompaña nafatin informasaun ne’ebé loos hodi labele halo sira pániku ligadu ho informasaun Coronavírus“, dehan Sekretáriu Estadu Akara liuhosi konferensia imprensa ne’ebé halo iha Palásiu Governu, segunda ne’e.

Governante ne’e husu ba públiku labele fiar ba notísia falsa ka hoax, ne’ebé daudaun ne’e la’o maka’as maibé fiar de’it ba notísia sira ne’ebé trasmite liuhosi kanál Estadu nian.

“Ami husu ba públiku labele fiar notísia sira ne’ebé maka rumór no notísia hoax sira, maibé  fiar de’it ba kanál informasaun sira ne’ebé maka Estadu nian hanesan Rádiu Televizaun Timor-Leste, Empreza Públika (RTTL,EP) no Agência Notisioza Tatoli, inklui pájina ofisiál Sekretaria Estadu Komunikasaun Sosiál (SEKOMS) no pájina ofisiál Ministériu Saúde (MS), ne’ebé estabelese ona, inklui mídia privadu hanesan Timor Post, Suara Timor Lorosa’e (STL) no mídia seluk ne’ebé ita iha”, nia subliña.

Nia parte garante katak mídia Estadu rua no mídia sira seluk ne’ebé nia mensiona ne’e bele trasmite informasaun ne’ebé kredível, nune’e povu labele pániku ho informasaun falsu sira ne’ebé maka durante ne’e la’o.

Biban ne’e, nia husu ba parte MS atu kontinua kolabora hodi fó espasu ba jornalista hodi transmite informasaun relasiona ho COVID-19 nune’e povu bele kontinua akompaña.

Akara adianta, karreta móvel ne’ebé maka foin daudaun SEKOMS rasik lansa ona maka sei ajuda pesoál saúde iha bairru sira, hodi trasmite informsaun moras Coronavírus rasik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here