Eis PM Kay Rala Xanana Gusmão, tun direita hodi husu loza no supermerkadu-sira oferese apoiu sasán ba Timoroan ne’ebé hela provizóriu iha kuarentena. Imajen/Eugénio Pereira

DILI, 23 marsu 2020 (TATOLI)- Eis Primeiru-Ministru nu’udar mós lider karizmátiku, Kay Rala Xanana Gusmão, halo komunikasaun no kontaktu Governu Repúblika Popular Xina, atu fó apoiu ekipamentu médiku, ai-moruk no  brigada médiku  mai Timor-Leste hodi prevene pandemia Coronavirus (COVID-19).

Notísia Relevante : Prevene COVID-19, Xanana Husu Povu “Hakmatek” Iha Uma

Kay Rala Xanana Gusmão halo mós koordenasaun ho nivel ministériu-sira, hanesan Ministériu Negósiu Estranjeiru no Kooperasaun (MNE) ho Ministériu Saúde, atu bele reforsa komunikasaun no kooperasaun ho Governu Xina atu trata apoiu ne’e hosi Xina.

“Sim, agora iha hela kontaktu. Xina mós iha nia apoiu ne’ebé ita iha hela kontaktu para sira (Xina-red) haruka ai-moruk no haruka médiku mai hodi ajuda,” informa Kay Rala Xanana Gusmão, hodi responde Ajénsia Tatoli, ohin, hafoin vizita Timoroan ne’ebé submete hela ba kuarentena provizóriu iha   Otél Audian, Dili.

Xanana mós hato’o agradese ba Governu Australia ne’ebé ajuda hela Sentru Saúde Vera Krús, Dili, hodi sai hanesan fatin izolamentu ba suspeitu COVID-19.

Xanana mós apresia ho vontade umanu hosi Governu Xina, hafoin deklara livre hosi COVID-19 no Xina orienta ninia médiku ba ajuda fila-fali nasaun seluk hanesan, Italia, Portugál, Fransa no Indonézia rasik.

Notísia Relevante : Kuarentena Tibar Hahú Funsiona

“Ita nia nasaun foin afeta pozitivu ida. Ita husu kolaborasaun komunidade nian para evita-aan hosi moras ne’e e. Husu povu labele pániku hodi halo tuir orientasaun médiku para ita hetan di’ak,” Xanana hateten.

Iha fatin Diretora Jerál Prestasaun Servisu Ministériu Saúde, Odete Viegas, hateten,  sira-nia parte kontaktu ona Embaixada Xina iha Timor-Leste hodi fó apoiu emerjénsia ba Governu Timor-Leste hodi tulun povu Timor-Leste

Xanana Husu Loza Sira Apoiu Sasán Ba Timoroan

Iha parte seluk, Xanana Gusmão mós halo vizita ba loza no supermerkadu iha área Audian nian hodi husu sira-nia apoiu sasán hanesan eskova, sabaun no sampo hodi fó apoiu ba maluk Timoroan sira ne’ebé hela provizóriu iha fatin kuarentena Tibar, Otél Audian no Otél Novo Horizonte, Metiaut, Dili.

“Ha’u mai husu imi nia ajuda para fó apoiu sabaun, pastadente no eskova hamoos nehan nian ba ita nia família ne’ebé ita tau ona iha kuarentena para sira bele uza,” Xanana lia-tun ba supermerkadu na’in no loja na’in-sira.

Tuir observasaun Ajénsia Tatoli nian nota katak, loza ho supermerkadu sira ne’ebé lokaliza iha área Audian sente kontente hodi oferese direita sira-nia apoiu hirak ne’e ba Lider Karizmátiku ho ekipa akompaña husi Xefe Gabinete Sekretáriu Estadu Komunikasaun Sosiál (SEKOMS), Júlio Gonçalves ho ekipa Eskolta Korpu Seguransa Pesoál (CSP) akompaña hosi média nasionál, lori kedas apoiu hirak ne’e ba fahe direita Timoroan sira.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here