Lider Karizmátiku, Kay Rala Xanana Gusmão, observa direita Timoroan ne’ebé izola iha fatin kuarentena Otél Novo Horizonte Metiaut, Dili. Imajen/Eugenio Pereira

DILI, 23 marsu 2020 (TATOLI)- Lider Karizmátiku, Kay Rala Xanana Gusmão, husu ba povu iha kapitál  Dili no iha territóriu tomak atu temporariamante “hakmatek” iha ida-idak nia-uma hodi evita pandemia Coronavirus (COVID-19).

Notísia Relevante : Timoroan 12 Mai-husi Austrália Kuarentena iha Novo Horizonte

Lider Karizmátiku, Kay Rala Xanana Gusmão, observa direita Timoroan ne’ebé izola iha fatin kuarentena Otél Novo Horizonte Metiaut, Dili. Imajen/Eugénio Pereira

Xanana Gusmão fó sai  avizu ne’e, tanba konsidera pandemia COVID-19 perigu ba ema-nia saúde.

“Ha’u husu ba populasaun lalika mai konsulta lai iha klínika Vera Krús, tanba ne’e fatin instala ba COVID-19, iha ne’e iha ona pasiente pozitivu ida. Ne’e duni, husu ba xefe aldeia ho xefe suku  para husu populasaun labele liu iha ne’e,” Xanana hateten lia-hirak ne’e, ohin, bainhira akompaña Vise Ministra Saúde, Elia dos Reis Amaral no Komandante Operasaun PNTL, Pedro Belo ho Komandante PNTL Munisípiu Dili, Superintendente Xefe, Armando Monteiro, ba observa diretamente kondisaun Sentru Saúde Vere Krús, Dili.

Xanana bolu atensaun mós ba Polísia no Seguransa Sivíl atu labele husik tan ema liu iha loron Sentru Saúde Vera Krús nian.

Durante hala’o vizita, Xanana uza máskara metin observa diretamente kondisaun iha Sentru Saúde Vera Krús ne’ebé harii ona hodi izola pasiente sira ne’ebé deskonfia afetadu COVID-19.

Hafoin halo observasaun, Xanana ho ekipa vizita mós fatin Kuarentena provizóriu ne’ebé sei harii mós iha Tibar.

Notísia Relevante : Ema Na’in 93 Tama Kuarentena iha Metiaút

Xanana husu ba povu Tibar atu koopera, tanba sentru kuarentena ne’e atu fó de’it asisténsia ba ema-sira ne’ebé fila husi rai li’ur no ba suspeitu-sira ne’ebé pozitivu ona sei hala’o izolamentu iha Sentru Saúde Vera Krús Dili.

Hafoin iha Tibar, Xanana Gusmão kontinua vizita ba Aeroportu Dili hodi haree fatin kuarentena provizóriu ne’ebé harii hodi atende pasajeiru sira bainhira ho aviaun mai husi rai li’ur.

Iha Aeroportu Xanana ajuda médiku ho ekipa Bombeiru lori ai-moruk rega direita iha jardín no fatin importante sira ne’ebé pasajeiru-sira utiliza atu evita pandemia COVID-19.

Iha fatin hanesan, Xanana vizita mós Timoroan sira ne’ebé daudauk ne’e submete hela iha kuarentena provizóriu iha Otél Novo Horizonte, Metiaut, Dili.

Xanana husu ba Timoroan sira ne’e hodi koopera ho governu nu’udar solusaun pozitivu ajuda governu prevene povu tomak hosi COVID-19 ne’ebé afeta ba nasaun 170-liu.

“Ha’u hadomi imi, imi tenke koopera atu izola-aan para ita prevene moras ne’e. Imi semana rua aguenta hela lai iha ne’e prevene Timoroan tomak labele moras, ita la hatene imi mai mak lori moras kona fali família se maka responsabiliza, ha’u rasik mós hanoin tebes ita nia nasaun, ita hotu labele hanoin-barak, ha’u husu imi toba iha-ne’e hodi rekoopera-aan,” dehan Xanana.

 “Italia, Fransa, Portugál mós sira-nia povu sofre COVID-19, tanba ne’e ita rai ki’ik tenke prevene aan mós,” Xanana tenik.

Iha parte seluk, Diretora Jerál Presaun Servisu Ministériu Saúde, Odete Viegas dehan, Timoroan ne’ebé daudaun ne’e hela provizóriu iha kuarentena kontinua hetan asisténsia hosi médiku durante oras 24 nia laran to’o loron 14.

Nia dehan, Governu Timor-Leste rasik hetan apoiu asisténsia hosi Governu Australia no Xina maka fó hela apoiu sasán no fasilidade saúde nian.

Nia hatutan, Timoroan ne’ebé hela provizóriu iha fatin kuarentena Otél  Audian mós agora hela asisténsia hosi médiku-sira hodi observa mós sira-nia situasaun saúde.

Jornalista : Eugénio Pereira

Editór       : Francisco Simões

2 KOMENTÁRIU

  1. Xanana tun direitamente tiha ona iha povo nia let no oinsa ho lider sira seluk hanesan, Luolo, Maria Alkateri, Taur matan ruak, Ramos Horta no sira luk tan?????

HAKEREK NO HATÁN

Please enter your comment!
Please enter your name here