Prezidente Parlamentu Nasionál, Arão Noe de Jesus Amaral. Imajen/António Goncalves

DILI, 23 marsu 2020 (TATOLI)—Parlamentu Nasionál (PN), segunda (23/3/2020) lokraik ne’e simu ona pedidu ida hosi Governu kona-ba proposta estraordinária hodi halo levantamentu ba fundu petrolíferu.

“Ha’u foin simu pedidu hosi Governu. Pedidu ne’e kona-ba levantamentu ba fundu petrolíferu, tanba ne’e sei ajenda pedidu ho karáter urjénsia,” dehan Prezidente Parlamentu Nasionál Nasionál, Arão Noé de Jesus da Costa Amaral, liuhosi plenária, segunda ne’e.

Arão Noé promete sei tau importánsia ba pedidu levantamentu Governu nian nune’e sustenta mákina estadu liuhosi orsamentu duodésimu.

Antes ne’e, Arão Noé esplika, montante orsamentu ne’e depende ba Governu nia kalkulasaun, tanba daudaun ne’e millaun $116 finánsia duodésimu ba fulan-ida hodi hein aprovasaun Orsamentu Jerál Estadu.

“Tuir lei dalan seluk labele (Governu foti direta), se di’ak liu ita kumpri regra ne’ebé iha tanba Lei Jestaun Finanseira no Lei Fundu Petrolíferu hatete só liuhosi Orsamentu Jerál Estadu ho autorizasaun parlamentu ninian,” nia argumenta.

Nia subliña, bainhira governu aprezenta proposta lei tenke hetan promulgasaun hosi Prezidente Repúblika foin vigora no fó dalan ba Governu halo levantamentu.

Notísia Relevante: Proposta Alterasaun Lei Tributária No Lei Fundu Petrolíferu Aprovadu, Aban Governu Submete Ba PN

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here