Imajen Tatoli/António Gonçalves

DILI, 23 marsu 2020 (TATOLI)—Parlamentu Nasionál (PN) aprova votu pezár ba saudozu Afonso Rangel “Tatamou” no saudozu Victor da Costa “Sugiono”.

Veteranu Afonso da Costa Rangel “Tatamou” hakotu iis iha Hospital Nacional Guido Valadares (HNGV) iha loron sesta 28/2/2020 tanba sofre moras infesaun. Purtantu Veteranu Victor da Costa “Sugiona” hakotu iis iha 17 marsu 2020, iha nia rezidénsia Bidau, Dili.

Prezidente Parlamentu Nasionál, Arão Noé de Jesus da Costa Amaral hateten, veteranu sira mak funda rai ida-ne’e tanba ne’e sira merese hetan votu pezár.

Votu pezár ne’e hanesan Parlamentu Nasionál presta omenájen ikus ba saudozu na’in-rua. Deputadu sira aprova votu pezár Saudozu Afonso da Costa Rangel “Tatamou” a-favór  63 no saudozu Victor da Costa “Sugiono” ho votu a-favór  64.

Deputadu FRETILIN, David Dias Ximenes hateten, saudozu Afonso “Tatamou” sé mak la koñese tanba ne’e merese hetan votu pezár ne’e.

“Ema hotu-hotu hatene sé mak saudozu Tatamou, hanesan mós ba saudozu Victor, tanba sira-nia kontribuisaun mak to’o ohin loron ita hetan Liberdade,” dehan Deputadu David dias Ximenes “Mandati” molok aprova votu pezár, iha plenária Parlamentu Nasionál, segunda ne’e.

Deputada CNRT, Bendita Magno Monis, reforsa maske nia mate ona maibé nia memoria sei hamutuk ho povu Timor-Leste.

“Ema hotu-hotu hatene sé mak Afonso Rangel, hahú kedas hosi Maun Boot Xanana to’o ita hotu,” dehan Deputada Bankada CNRT ne’e.

Nune’e mós Deputadu José Virgílio, hato’o votu pezár ba saudozu na’in-rua ne’ebé husik ona mundu.

“Ha’u sei lembra kuandu sei tuir sira iha prosesu luta ba libertasaun nasionál, ha’u hatene sira-nia kontribuisaun boot tebes. Hanesan jerasaun foun, ami tenke halo-tuir,” nia hateten.

Entretantu Deputadu Bankada FRETILIN, Agustinho Siqueira “Somoxo” hato’o sentida kondolénsia ba família no oan kiak sira.

“Ha’u hanoin ita lakon figura rezisténsia na’in-rua importante, saudozu Victor da Costa hanesan mós figura polítiku ida, iha tempu klandestina, hanesan mós Tatamou. Ha’u-nia onra no Gloria ba saudozu Tatamou no Victor da Costa,” nia dehan.

Xefe Bankada Parlamentár PLP, Deputadu Cornelio Gama “L7” hato’o votu pezár ba saudozu na’in-rua ne’e.

“Ha’u-nia maluk veteranu barak mak mate iha ai-laran. Uluk ami dehan ó mate, ha’u moris, ha’u hasai ó-nia ruin,” haktuir L7.

Xefe Bankada PD, António da Conçeição “Kalohan” hato’o sentida kondolénsia ba saudozu na’in-rua ne’ebé husik ona povu Timor-Leste.

Deputadu PLP, Sabino Soares “Guntur” afirma bainhira ema rezisténsia ruma mate parlamentu sempre louva sira-nia kontribuisaun ba prosesu funu ida-ne’e.

“Só sira mate mak ita gava. Sira sei moris, ita nunka tau importánsia. Ha’u hanoin estadu tenke valoriza didi’ak sira. Labele kakutak mamar mak hato’o omenájen de’it. Valoriza ho material la’ós ho liafuan mamuk,” dehan deputadu PLP ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here