DILI, 23 marsu 2020 (TATOLI)–Movimentu Tasi Moos (MTM), ho inisiativa rasik hala’o limpeza hodi hamoos fatín Públiku sira iha Dili laran hodi kontribui ba luta kontra Coronavirus. 

“Ami husi Movimentu Tasi Moos, liga ho situasaun ne’ebé akontese globalmente, katak ita hasoru daudaun susar boot ida ne’ebé mak ita la konsege haree naran Coronavirus (COVID-19). Virus ne’e perigozu ba ema-nia vida, la iha ai moruk atu kura. Ne’eduni, ami hanesan joven ba nasaun ne’e, ami sente katak ami iha obrigasaun hodi kontribui netik buat ruma ba prevensaun, oinsa salva povu no nasaun ida ne’e,” dehan Koordenadór Movimentu Tasi Moos, Galio Soares Araújo, ba Ajénsia TATOLI iha Palásiu Governu, Dili, ohin.

Nia hatutan, ho ida ne’e mak MTM deside katak hahú ohin ba oin, presiza uitoan ka barak kontribui hodi tama no hamoos, fase, fatin publiku sira, fase ho sasan báziku ne’ebé maka Ministériu Saúde rasik fó sai ona katak presiza uza deterjente.

“Ami-nia kontribuisaun kiik liu mak ida ne’e. Ami espera katak, uma-Kain sira seluk hahú daudaun, hodi hamoos uma laran, varanda, no ambiente iha uma. Atu nune’e, ita hamutuk luta kontra Virus perigozu ida ne’e. Ohin, ami mai uluk iha Palásiu Governu nia oin, hanesan medida ida fanun Governu atu oinsá reajen lalais, atua situasaun emerjénsia ida-ne’e,” nia hateten.

Iha loron Primeru Ohin nian, nia hateten, MTM lori bee tanki ida ho volume bee litru rihun neen, lori mós sabaun clean no buat seluk tan hodi hamoos fatin públiku.

Tuir trajetu, nia hatutan, aban MTM sei kontinua hamoos fatin públiku sira. Maski ohin la to’o na’in sanulu, maibé MTM hakarak kontribui aban no bainrua sei iha ema voluntáriu sira barak liután.

“Ami sei kontinua hamoos fatin públiku sira no ami seidauk termina loron atu para. Ami-nia trajetu sei hamoos fatin públiku hanesan Palásiu Governu, spitál sira, aeroportu, Largo Lecidere no seluk tan ne’ebé iha sirkulasaun ema barak nian.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here