OSSU, 22 marsu 2020 (TATOLI)—Komunidade iha Ossu deteta fós ho marka “NASI ENAAK” kontaminadu ho objetu estrañu ne’eb’e identiku ho adubu (pupuk) ne’ebé baibain uza hodi habokur rai.

Hafoin deteta fós ne’e kontaminadu ho adubu, komunidade Francisca Guterres(65), husi Aldeia Kaiwaiho, Suku Ossu de Xima, Postu Administrativu Ossu, Munisípiu Viqueque, hato’o kedas ba parte autoridade lokál inklui Ofisiál Polísia Suku (OPS).

Fós ho todan kilograma 25 ne’e, ninia distributór mak PERISOS Importasaun no Eksportasaun, Lda, ne’ebé distrubui no faan to’o iha munisípiu sira iha parte leste.

“Ha’u tau tiha bee ba, ha’u kuu tan aidila tahan tau ba, ha’u tein tasak tiha. Ha’u haruka labarik mai suru tiha katuas nian lori ba leten no ha’u komesa han. Ha’u foin han, ha’u nata, sente tarutu hanesan fatuk. Entaun, ha’u soe tiha. Ha’u koko han tan kanuru ida, maibé sente buat ne’e nafatin de’it, tarutu nafatin hanesan nata-kona fatuk. Tanba ne’e mak hau hanoin katak, dala ruma fos ne’e iha fatuk. Ha’u fakar tiha fos ne’e, haree ba buat ne’e mak iha fali. Nune’e, ha’u fó hatene kedan xefe Suku,” Francisca Guterres konta tuir ba Ajénsia TATOLI iha Aldeia Kaiwaiho, Ossu, horisehik.

Nia haktuir, fós ne’e nia oan feto mak hola no lori hosi Baucau, hamutuk saku rua no kada saka kilograma 25.

“Fos ne’e ha’u-nia oan feto mak lori mai hosi Baucau iha sesta loron 20 fulan ne’e. Hamutuk karon rua. Ida, ba ha’u no ida seluk ba ha’u-nia oan mane naran Domingos.” nia konta tuir.

Iha fatin hanesan, Xefe Suku Ossu de Xima. Celetino Monteiro de Carvalho kondena, kompañia distribuidór fós atu tau atensaun ba situasaun ne’e tanba povu barak mak asesu no konsumu fós ne’e.

“Nu’udár autoridade lokál, ha’u haree buat ne’ebé maka ha’u-nia komunidade enfrenta, liuliu konsumu etu husi fós ne’ebé kontaminadu ho objetu estrañu, ida ne’e konsidera fós ne’e kontaminadu no sei fó impaktu la di’ak ba saúde povu-nian,” nia fó atensaun.

Tanba nee, Xefe Suku ne’e husu ba Governu liuliu ministériu relevantes, ho nia dirasaun sira hanesan AIFAESA atu toma atensaun ba distribuidór fos ho Marka “Nasi Enaak” atu labele halo buat ida ne’e.

“Hanesan autoridades lokál, husu ba Governu atu prosesa asuntu ne’e ba oin no mós husu ba kompañia ne’ebé mak ninia produtu to’o mai iha área rurál no ho realidade ida ne’e, tenke responsabiliza,” nia alerta.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here