DILI, 23 marsu 2020 (TATOLI)–Hafoin udan boot no inundasaun iha sesta (13/03/2020) semana kouk ne’ebé rezulta kanu ne’ebé Diresaun Nasionál Servisu Agua (DNSA) oferese ba komunidade sira iha Maloa tohar, ohin, komunidade Maloa ho inisiativa rasik hadi’a hikas ona kanu refere.

Xefe Departamentu Abastesimentu Água Munisípiu Dili, Francisco Xavier, apresia ba komunidade Maloa ninia inisiativa hodi hadi’a hikas kanu ne’ebé tohar tanba inundasaun ne’e.

“Ha’u apresia tebes ho komunidade sira iha Maloa tanba sira inisiativa rasik hodi hadi’a kanu tohar ne’ebé afeta husi inundasaun semana kotuk liu bá”, dehan Xefe Departamentu Abastesimentu Água Munisípiu Dili, Francisco Xavier ba Ajénsia TATOLI iha nia knar fatin, Caicoli, Dili, ohin.

Nia hatutan, ho komunidade sira-nia inisiativa rasik mak parte ekipa task force husi SAS mós ajuda lori kanu nune’e hadi’a no monta kanu tohar sira iha rai okos.

“Ami-nia ekipa taks force husi SAS lori kanu hodi troka kanu ne’ebé mak tohar no lakon nune’e to’o agora monta fali ona kanu. Maibé, serbisu hirak ne’e komunidade nia inisiativa rasik duni inklui Institutu Jestaun Ekipamentu (IGE),” nia dehan.

Aleinde hadi’a kanu iha Maloa, nia informa, SAS mós hadi’a daudaun ona kanu ne’ebé tohar ne’ebé kauza husi inundasaun hanesan mota Lahane, Taibesse, Bemori no My friend.

“Kanu ne’ebé afeta husi inundasaun ne’ebé tohar no mota lori kanu mak parte mota Taibesse, Bemori nian no Ponte My friend nian. Maibé, ami-nia ekipa task force ho IGE ba lás no troka dadudaun ona,” nia dehan.

Nia dehan, kanu ne’ebé estraga barak liu mak mota nia moru kontensaun (tembok penahan) la metin entaun afeta fali ba kanu sira ne’e.

Daudaun ne’e, nia hateten, parte DNSA kontinua esforsu hadi’a no monta kanu ne’ebé mak at iha sidade Dili nian depois inundasaun tanba komunidade barak mak seidauk bele asesu bee-moos hosi liña distribuisaun hosi DNSA nian.

Notísia Relevante: Hafoin Lalubur, Komunidade Lahane Osidental Seidauk Bele Asesu Bee-Moos

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here