Imajen tatoli/António Goncalves

DILI, 23 marsu 2020 (TATOLI)—Bankada Parlamentár Kmanek Haburas Unidade Nasionál Timor Oan (KHUNTO) deklara sei vota kontra proposta alterasaun Lei Orsamentu no Jestaun Finanseira (LOJF) maibé Frente Revolusionária Timor-Leste Independente (FRETILIN) sei apoia.

Tuir loloos, ohin, votasaun ba proposta alterasaun ne’e halo ona maibé tanba ahi-mate derrepente entaun adia ba aban (tersa, 24 marsu 2020) dadeersan.

Pedidu ne’e ho karáter urjénsia ne’e kona-ba Proposta Lei no.12/V (2a)-alterasaun datoluk lei no.13/2009, de 21 de outubru kona-ba Orsamentu no Jestaun Finanseira.

Xefe Bankada Parlamentár KHUNTO, Deputadu António Nobre Tilman, konsidera pedidu ho karáter urjénsia la pertinente.

“Urjente liu mak ita aprova osan (Governu husu pedidu levantamentu ba fundu minarai) hodi sosa ekipamentu hodi hasoru Coronavirus, tanba ne’e ami bankada KHUNTO sei vota kontra pedidu ne’e,” dehan Xefe Bankada KHUNTO liuhosi plenária, sesgunda ne’e.

Nune’e mós Xefe Bankada Parlamentár Partidu Demokrátiku (PD), António da Conçeição “Kalohan” hateten, pedidu ho karáter urjénsia husu halo revizaun ba Lei Orsamentu no Jestaun Finanseira.

Kalohan konsidera pedidu ho karáter urjénsia mai hosi situasaun dilemátika rua, ida iha ámbitu polítiku, ida seluk iha ámbitu jurídiku.

“Iha ámbitu polítiku ezisténsia governu hala’o liu ona prosesu ne’ebé agora sei pendente hela iha Prezidente Repúblika nia liman. Bankada Partidu Demokrátiku husu ita refleta didi’ak ho revizaun ba artigu 31 kona-ba Lei Orsamentu no Jestaun Finanseira, ladún opurtunu atu halo revizaun ba lei estruturante ida. Proposta alterasaun lori ita ba dúvida barak tanba ne’e presiza deskuti iha tempu ne’ebé opurtunu, maibé la’ós iha tempu ida ne’e,” dehan Xefe Bankada PD ne’e.

Entretantu, Deputadu CNRT, Adérito Hugo da Costa hateten, situasaun iha Tibar ne’e laiha osan ka laiha vontade.

“Señor Ministru Reforma Lejizlativa no Asuntu Parlamentár mai promete iha reuniaun líder bankada atu hato’o mak pedidu levantamentu estraordinária ba fundu petrolíferu, nusá mak husu fali atu halo alterasaun ba artigu 31 lei orsamentu no jestaun finanaseira. Tanbasá mak agora foin mak husu. Buat ruma la loos iha proposta ida-ne’e,” Deputadu CNRT ne’e hateten.

Deputadu Partidu Libertasaun Populár (PLP), Francisco Vasconselos hateten, situasaun atuál oras ne’e opurtunu altera lei refere hodi fó resposta ba dezastre naturál no oras ne’e deteta ona kazu Coronavirus iha Timor-Leste.

“Laiha ema ka Governu ida ho intensaun altera lei hodi hariku nia-an, ne’e laiha. Se dehan urjénsia ka lae, ami dehan urjénsia. Se Orsamentu Jerál Estadu liu karik entaun agora ita deskute iha ne’e ida,” nia hateten.

Deputadu FRETILIN, Francisco Branco, alterasaun ne’e atu halo rezolve problema nasionál, tanba ne’e labele halimar ho kór polítika.

“Ita-nia estadu emerrjénsia nasionál tanba ne’e tenke debate urjénsia duni ba alterasaun ne’e. Ha’u hanoin haree kestaun ne’e ho konsiénsia estadu nian. Sé mak kria situasaun ne’e hodi la viabiliza Governu. Tanba ne’e, alterasaun ne’e pertinente hodi fó solusaun bai ta-nia problema,” nia dehan.

Iha biban ne’e, Deputada CNRT, Carmelita Caetano Moniz hateten, urjénsia liu mak halo levantamentu ba fundu petrolífetu hodi fó ba Governu rezolve problema sira iha rai-laran.

“La’ós ho dalan altera lei, membru CNRT mós sei membru Governu hela. Tanba ne’e mak dalan di’ak liu mak husu pedidu mai parlamentu hodi halo levantamentu ba fundu petrolíferu, tanba ne’e la iha razaun atu altera lei. Se pedidu levantamentu ami promete sei aprova loron ida de’it hodi responde situasaun emerjénsia,” nia dehan.

Entretantu Deputada FRETILIN, Lídia Norberta Martins, konsidera ne’e pedidu ne’e merese tama iha karáter urjénsia tanba hareee ba problema inundasaun no problema boot ida kona-ba Coronavirus.

Deputadu Partidu Demokrátiku (PD), Adriano do Nascimento, apoia inisitiva Governu nian hodi husu parlamentu halo alterasaun ba lei ne’e.

“Ha’u hanoin Primeiru-Ministru iha plenu-podér tomak halo pedidu mai parlamentu hodi husu alterasaun tanba situasaun ida agora ne’e presiza duni responde ho emerjénsia. Ha’u vota a-favór ba pedidu ne’e,” nia hateten.

Entretantu, Xefe Bankada Parlamentár UDT/FM, Deputadu Francisco David Xavier Carlos, konsidera alterasaun ne’e la importante, importante mak Governu husu de’it pedidu levantamentu ba fundu petrolíferu.

Hatán ba preokupasaun ne’e, Ministra Finansas Ein-Ezersísiu Atuál Vise-Minisra Finansas, Sara Lobo Brites argumenta, rejime duodesimál nu’udar rejime espesiál iha ezekusaun orsamentál aplikavel bainhira orsamentu jerál estadu la vigora iha inisiu tinan finanseira.

“Rejime duodesimál regula iha artigu 31, lei 13/2009, 21 de Outubru kona-ba Orsamentu no Jestaun Finanseira. Rejime duodesimál hodi permite estadu la’o normál no fó biban desepeza públiku to’o hetan Orsamentu Jerál Estadu vigora anteriormente”, esplika Ministra Finansa Ein-Ezersísiu,” nia esplika

Notísia Relevante: Semana Oin, PN Debate Proposta Alterasaun Lei Orsamentu no Jestaun Finanseira

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here