Prezidente Komisaun Funsaun Públika, Faustino Cardoso, ho ekipa ohin hasoru Primeiru-Ministru, Taur Matan Ruak, iha Palásiu Governu. Imajen Tatoli/Egas Cristovão

DILI, 23 marsu 2020 (TATOLI)Relasiona ho sirkulasaun COVID-19 ne’ebé to’o oras ne’e Timor-Leste rejista ona kazu dahuluk ema na’in-ida pozitivu, maka liuhosi deliberasaun Komisaun Funsaun Públika (KFP) konsiente iha posibilidade tempu badak Prezidente Repúblika sei dekreta Estadu Emerjénsia, tanba ne’e presiza iha preparasaun másimu atu asegura funsionamentu Administrasaun Públika (AP).

Deliberasaun ne’e fó sai iha reuniaun estraordinária ba da-92 KFP, ne’ebé realiza iha loron 20 marsu 2020.

“Konsidera iha nesesidade atu asegura funsionamentu Administrasaun Públika durante medida restritiva ne’ebé mai husi deklarasaun Estadu Emerjénsia”, refere deliberasaun husi KFP ne’ebé Agência Tatoli asesu, segunda ne’e.

Nota ne’e subliña, KFP prontu atu implementa medida kontijénsia atu asegura funsionamentu atividade iha área kompeténsia sira.

Nune’e, deside sei halo preparasaun atu implementa rotasaun traballu ho mínimu ema atu asegura funsionamentu atividade ba kada diresaun.

Sei determina mós funsionáriu kontratadu ho idade liu tinan-50 ho sofre moras respiratóriu krónika no sei halo atividade profisionál sira husi uma.

Liuhosi deliberasaun ne’e, fó sai katak sei implementa distánsia metru rua entre funsionáriu sira iha servisu fatin.

Nota ne’e refere liután katak presiza mantein nafatin kontaktu ativu liuhosi meiu komunikasaun hanesan Whatsapp entre funsionáriu iha kada diresaun, nune’e bele bele responde durante rotasaun traballu.

Deliberasaun ne’e fó sai mós katak, sei institui apoiu transporte ba pesoál durante servisu rotasaun no sei determina mós distribuisaun pulsa ba uzu internet.

Nune’e mós, autoriza uzu laptop ba funsionáriu sira.

Iha sorin seluk, atu reforsa limpeza disinfesaun iha edifísiu KFP no determina vizitante no funsionáriu ne’ebé lori sasán tama edifísiu KFP ho liman.

Ikus liu distribui luvas no máskara ba pesoál servisu ne’ebé halo rotasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here