Kondisaun Ponte Becusse hafoin inundasaun ne’ebé akontese iha sesta (13/03). Imajen Tatoli/António Gonçalves.

DILI, 23 marsu 2020 (TATOLI) – Konsellu Administrasaun Fundu Infraestutura (KAFI) aprova ona millaun $15 ba kustu estimasaun estragu inundasaun husi udan boot iha sesta (13/03), ne’ebé aprezenta husi ekipa Task Force ne’ebé lidera husi Ministériu Planeamentu, Investimentu no Estratéjiku (MPIE) no Ministériu Obra Públika (MOP).

Ministru Obra Públika, Salvador Eugênio Soares dos Reis Pires, informa ekipa Task Force, ne’ebé kompostu husi ministériu rua aprezenta ona kustu estimasaun hodi bele halo rekuperasaun ka hadi’a estragu husi inundasaun hanesan estrada, ponte, eletrisidade, kanalizasaun bee-moos no eskola sira.

Ba kestaun ne’e, Ministru Salvador informa, ekipa ne’e halo ona identifikasaun kuaze ba obra emerjénsia hamutuk 23, ne’ebé maioria lokaliza iha kapitál Dili, inklui munisípiu balun ne’ebé hetan afetadu husi inundasaun, tanba ne’e presiza kontrata kompañia sira atu hahú onra hirak ne’e.

“KAFI deside ona 23 lokalizasaun ne’ebé sira (Task Force) sei halo identifikasaun ba kada  kazu no mós selesaun ba kompañia sira atu halo obra emerjénsia ba rekuperasaun sira no justifika mós kompañia sira ninia kapasidade finaseiru, tékniku ho justifikasaun legál, atubele avansa no fó ba Konsellu Nasionál aprovisionamentu (CNA, sigla portugés) rezolve kontratu ba kada ministériu atubele tama rekuperasaun”, informa Ministru Salvador ba Agência Tatoli, iha Sentru Konvesaun Dili (CCD, sigla portugés), segunda ne’e.

Kona-ba kustu orsamentu, nia dehan sei hadi’a estragu sira iha área obra públika hanesan torre transmisaun no tranformadór eletrisidade sira ne’ebé besik mota no identifika atu a’at ona,  hadi’a kanalizasuan bee-moos iha área Maloa, Becusse no My friend, hadi’a ponte no estrada inklui eskola tolu ne’ebé hetan estragu.

“Obra emerjénsia hamutuk 23, KAFI deside atu fó kontratu ba kompañia sira atu halo rekuperasaun emerjénsia ba estrada, inklui hadi’a ponte tolu hanesan My Friend, Becusse, Hera, retensaun ba barreira sira, estrada no hadi’a eskola 5 de Maiu, Sergio Veira de Melo no seluk tan”, nia akersenta.

Governante ne’e refere liután, ekipa Task Force estabelese bazeia ba despaisu husi Primeiru Ministru, Taur Matan Ruak, husi rezultadu enkontru ho KAFI, inklui entidade relevante sira hanesan Ajénsia Dezenvolvimentu Nasionál (ADN), CNA no Sekretariadu Grande Projetu (SGP) no mós ajénsia sira ne’ebé tutela iha MOP hanesan Diresaun Jerál Obra Públika, Servisu Água no Saneamentu (SAS) no Eletricidade de Timor-Leste (EDTL).

Kona-ba normalizasaun, tuir Salvador, MOP liuhosi Institutu Jestaun Ekipamentu (IGE, sigla portugés) sei kontinua fó prioridade atu haree fonte inundasaun, hodi halo normalizasaun ba mota Becusse, My Friend, Maloa no mota Hera atu hasa’e sedimentasaun, hadi’a kanalizasaun bee-moos no eletrisdade emerjente, nune’e komunidade bele asesu filafali.

Entretantu Diresaun Saneamentu Báziku hala’o ona hela limpeza jerál no hetan apoia husi setór privadu sira hodi hasa’e sedimentasaun iha drainajen no mota sira.

Entretantu, iha reuniaun estraordinária Konsellu Ministru segunda ne’e, Ministra  Finansa ein ezersísiu, Sara Lobo Brites, informa ba ezekutivu sira katak KAFI aprova ona orsamentu estimasaun ba estragu kauza inundasaun, hodi halo rekuperasaun liuhosi projetu emerjénsia hanesan kria moru ba liña transmisaun eletrisidade, retensaun ba barreira, aktividade limpeza jerál, no hadi’a infraestutura água no saneamentu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here