Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 23 marsu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hateten Governu sei esforsu hodi tau matan ba jornalista sira nian seguransa vida bainhira ba halo kobertura ba kazu COVID-19.

“Ita hakarak asegura ita-nian jornalista sira hotu tanba jornalista sira halo knaar importante. Hanesan mídia Estadu nian, sira iha subvensaun signifika labele hein de’it husi Governu maibé tenke iha preparasaun ho kondisaun mínimu. Instituisaun mídia sira hetan apoiu, inklui Rádiu Televizaun Timor-Leste (RTTL) no Agência Tatoli ne’ebé hanesan mídia estatál. Ein prinsípiu Governu komprementidu sei apoia ita-nia jornalista husi mídia hotu ba situasaun sira hanesan agora”, dehan Akara liuhosi konferénsia imprensa ne’ebé hala’o iha Palásiu Governu, segunda ne’e.

Governante ne’e rekoñese, jornalista ho médiku iha papél importante ligadu ho COVID-19 no hanesan grupu ne’ebé maka iha oin hodi kontra vírus, tanba ne’e Sekretaria Estadu Komunikasaun Sosiál (SEKOMS) halo esforsu hamutuk ho ekipa interministeriál sira ne’ebé lidera husi Ministeriu Saúde (MS) atu tau mós atensaun ba jornalista sira bainhira halo sira nian knaar.

“Ha’u transmite ona preukupasaun ida-ne’e no ohin deside ona iha Konsellu Ministru. Téknikamente sei komunika ho ita bo’ot sira bainhira iha desizaun finál ruma”, nia akresenta.

Nia adianta, atu hola sasán sira ne’e Governu liuhosi MS aloka ona orsamentu atu fó apoia ba parte hotu, nune’e bele iha preparasaun atu kombate COVID-19.

Jornalista: Natalino Costa

Editora: Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here