Primeiru-Ministru, Taur Matan Ruak, Prezide Reuniaun Konsellu Ministru Extraordinária iha Sentru Konvensaun Dili, segunda (23/03). Imajen Tatoli/Egas Cristovão

DILI, 23 marsu 2020 (TATOLI)Governu planea ona hodi asegura planu insentivu ida no halo esforsu ba kondisaun pesoál saúde no ajente seguransa sira, tanba ema hirak ne’e maka iha ligasaun direta bainhira iha ema ruma pozitivu COVID-19.

“Primeiru-Ministru afirma katak tenke asegura planu insentivu ida no halo esforsu ba kondisaun pesoál saúde sira, Polísia, Militár no ajente seguransa hirak ne’ebé sei servisu estraordináriu hodi fó protesaun ba ita hotu, iha ita-nia luta boot kontra COVID-19”, dehan Ministru Reforma Lejizlativa Asuntu Parlamentár, Fidelis Manuel Leite Magalhães hafoin reuniaun Konsellu Ministru (KM) iha Sentru Konvensaun Dili (CDD-sigla portugés), segunda ne’e.

Governante ne’e adianta, Governu mós sei halo esforsu ba infraestrutura saúde nian, fatin izolamentu, ekipamentu sira no ai-moruk.

“Konsellu ministru haree tiha ona no apresia proposta ne’e, maibé detallu hosi proposta ne’e sei informa iha loron tuir mai”, nia relata.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here