Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen/Egas Cristovão

DILI, 23 marsu 2020 (TATOLI) – Ezekutivu sira liuhosi reuniaun Konsellu Ministru (KM) aprova proposta ida ne’ebé aprezenta hosi Ministériu Transporte no Komunikasaun (MTK), hodi kria liña telefónika ho númeru 119 hodi asesu ba informasaun kona-ba COVID-19.

“Ministru Transporte no Komunikasaun, Agustinho da Silva aprezenta kona-ba medida sira iha setór komunikasaun nian no anunsia katak hahú aban (tersa) ba númeru emejénsia ba COVID-19 sei funsiona, númeru ne’e mak 119”, informa Ministru Reforma Lejizlativa Asuntu Parlamentár, Fidelis Manuel Leite Magalhães, hafoin reuniaun Konsellu Ministru, ne’ebé hala’o iha Sentru Konvensaun Dili (CCD-sigla portugés), segunda ohin.

Nune’e, governante ne’e husu ba komunidade katak utiliza númeru ne’e bainhira iha emerjénsia no labele uza hodi halimar.

“Tenke uza duni bainhira emerjénsia, labele uza hodi halimar se lae bele korta ligasaun telefónika ne’ebé tama, tanba ita-nia maluk sira ne’ebé presiza duni informasaun sei lahetan resposta ho lais”, nia adianta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here