Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen/Egas Cristovão

DILI, 23 marsu 2020 (TATOLI) – Maske Governu liuhosi Konsellu Ministru (KM) aprova ona rezolusaun governu hodi reativa atividade arte-marsiál, maibé kontinua husu ba membru grupu arte-marsiál (GAM) atu kumpre lei arma branka ka Lei númeru 5/2017.

Notísia Relevante : PM Taur Halo Enkontru “Amizade” ho IKS-Kera Sakti

Liuhosi rezolusaun governu númeru 16/2013, 10 jullu, suspende atividade GAM hanesan IKS.TL (Ikatan Keluarga Silat Timor-Leste) Kera Sakti, Persaudaraan Setia Hati Terate (PSHT) ho Kmanek Oan Rai Klaran (KORK).

“Hanesan desizaun governu nian liuhosi Konsellu Ministru halo ona revogasaun lei ba rezolusaun governu númeru 16/2013, 10 jullu ne’ebé suspende atividade GAM. Maibé, lei númeru 5/2017 kontinua funsiona,” esplika Ministru Reforma Lejizlativa no Asuntu Parlamentár (MRLAP), Fidelis Leite Mangalhães, ohin, hodi responde Ajénsia Tatoli iha Sentru Konvensaun Dili (CCD).

Fidelis Magalhães hateten,  arte-marsiál tolu ne’ebé antes ne’e governu suspende sira-nia atividade, agora bele hala’o, maibé tenke kumpre uluk lei númeru 5/2017 no rekizitu sira hosi Komisaun Reguladóra Arte-Marsiál (KRAM) atu hetan legalidade.

“Mekanizmu no rekizitu organizasaun arte-marsiál tenke rejistu, estatuta tenke klaru, tenke lista membru, pesoál responsavel, tenke iha fatin treinu no seluk tan ne’ebé tama iha lei númeru 5/2017,” esplika Ministru Fidelis Magalhães.

Notísia Relevante : IKS-Kera Sakti Buka Dalan Formaliza-Aan

Ministru Fidelis afirma katak, desizaun governu reativa atividade GAM fó vantajen  ba Estadu atu kontrola di’ak liu-tan GAM-sira no bele organiza kompetisaun hodi  kontribui ba dezenvolvimentu nasaun nian iha area arte no desportu.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here