Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 23 marsu 2020 (TATOLI)—Relasiona ho COVID-19 ne’ebé sai problema boot iha mundu no deteta ona kazu iha Timpr-Leste, Governu liuhosi Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, husu povu tomak atu labele fiar fonte informasaun ne’ebé la klaru maibé fiar fonte ne’ebé iha naran ona.

“Habelar informasaun ho kredivel, hahú agora bá-oin labele fiar informasaun ne’ebé ninia fonte la klaru tanba fontes kredivel klaru maka ekipa konjunta ne’ebé lidera hosi Ministériu Saúde. Tanba ne’e, Ministériu Saúde mak bele fó-sai informasaun hotu-hotu kona-ba coronavirus. Agora mídia komunikasaun estadu nian hanesan RTTL, Agência TATOLI no Rádiu Komunidade sira sei asegura informasaun ne’ebé mak loos ba ita-boot sira,” dehan Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, iha Parlamentu Nasionál, segunda ne’e.

SEKOMS sei kolabora ho mídia hotu-hotu iha rai-laran, liuliu mídia konvensionál, mídia ne’ebé iha naran no mídia ne’ebé iha ona kredibilidade.

Mericio Akara husu povu tomak labele fiar status pesoál balun iha facebook tanba barak liu hatutan informasaun ne’ebé falsa (hoax) hodi halo komunidade pániku.

Tanba ne’e SEKOMS mós hanesan membru konjunta ne’e sei fornese informasaun ne’ebé loos, kredivel ho fonte informasaun ne’ebé klaru.

Sekretáriu Estadu Komunikasaun ne’e fó-sai katak, oras ne’e informasaun falsa mak barak liu kompara informasaun ne’ebé loos.

Mericio Akara husu ba povu tomak atu labele pánika ba COVID-19, maibé fiar Governu hodi halo prevensaun hasoru moras ne’e.

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here