Vise-Ministru ba Dezenvolvimentu Estratéjiku Saúde Bonifácio Maukoli dos Reis.Imajen Tatoli/Antonio Goncalves

DILI, 23 marsu 2020 (TATOLI) – Vise-Ministru ba Dezenvolvimentu Estratéjiku Saúde, Bonifácio Maukoli dos Reis, informa ótel sira ne’ebé utiliza hodi sai fatin kuarentena Governu maka finansia hotu, bainhira iha ema estranjeiru ka timoroan ne’ebé foin maka tama husi fronteira ka aeroportu no lori ba fatin kuarentena durante loron 14.

“Ótel sira ne’e Governu maka aluga no hahán sira mós providensia hosi Estadu”, hateten Vise-Ministru Bonifácio, hafoin reuniaun Konsellu Ministru estraórdinaria, ne’ebé hala’o iha Sentru Konvensaun Dili (CCD, sigla portugés), segunda ne’e.

Kona-ba kada kuartu montante hira, governante ne’e dehan seidauk bele anunsia.

“Seidauk hatene kuartu ida kustu hira, tanba ne’e ekipa tékniku mak hatene. Kona-ba hahán no saida de’it ne’e providénsia hosi Estadu, maibé nafatin ha’u hanoin ita laiha posibilidade atende liután no agora ami muda sistema hodi orienta ona ekipa atu halo screening ba sira ne’ebé laiha sintoma bele ba uma”, nia akresenta.

Tuir desizaun Governu, ema hirak ne’ebé tama husi aeroportu no fronteira, tenke tama kuarentena durante loron 14 no haree bainhira laiha sintoma ba COVID-19, sei haruka ba uma no ida ne’ebé identifika pozitivu ba COVID-19 maka sei foti sai hodi tau fali iha fatin izolamentu.

“Kuandu pozitivu maka ami foti lori ba tau iha fatin izolamentu no foti amostra hodi halo analiza. Ami sei haruka tan ba Austrália hodi konfirma liután, maske ita iha ona laboratóriu nasionál hodi halo teste, maibé haruka tan ba Australia atu konfirma liután”, Bonifácio adianta.

Relasiona ho orsamentu ba selu kuarentena, Ministru Reforma Lejizlativa Asuntu Parlamentár, Fidelis Manuel Leite Magalhães, hateten antes ne’e Governu liuhosi reuniaun Konsellu Ministru aprova ona orsamentu hamutuk millaun $1,5 hodi haree ba preparasaun relasaun ho COVID-19.

“Kona-ba ida ne’e, antes Konsellu Ministru aprova tiha ona millaun $1,5 no osan sira ne’e aprova hodi prepara ba ekipamentu prevensaun vírus ne’e”, nia relata.

Entretantu ótel ne’ebé Governu utiliza sai hanesan kuarentena mak hanesan Ótel Audian no Ótel Novo Horizonte.

Jornalista: Antónia Gusmão

Editora: Julia Chatarina

1 KOMENTÁRIU

  1. Ha’u apresia tebes ba servisu Madia Tatoli tamba update informasaun sempre Los no lolos maske ezistensia Media ida ne’e foin dezenvolve an husi mundu teknoligia maibe kontribui ona ba ita rain liu husi informasaun ne’ebe kada loron partila ba públiku.
    Espera katak iha futuru Media Tatoli servisu makas hodi hadia diak liu tan.

HAKEREK NO HATÁN

Please enter your comment!
Please enter your name here