Primeiru-Ministru, Taur Matan Ruak, Prezide Reuniaun Konsellu Ministru Extraordinária iha Sentru Konvensaun Dili, segunda (23/03). Imajen Tatoli/Egas Cristovão

DILI, 23 marsu 2020 (TATOLI) – Governu liuhosi reuniaun Konsellu Ministru (KM) segunda ne’e deside hodi redús prezensa funsionáriu kada Instituisaun Estadu iha servisu fatin hodi evita distánsia sosiál relasiona ho kazu COVID-19 ne’ebé konfirmadu ona pozitivu na’in-ida iha Timor-Leste.

Hafoin reuniaun ezekutivu, Ministru Reforma Lejizlativa Asuntu Parlamentár, Fidelis Manuel Leite Magalhães, informa katak Primeiru-Ministru, Taur Matan Ruak fó instrusaun ba membru Governu sira hotu katak kada Instituisan Estadu tenke hahú redús prezensa funsionáriu sira hotu iha servisu fatin, ho forma atu mantein mínimu no nesesáriu ba servisu públiku esensiál de’it hodi bele kontinua ninia funsionamentu.

“Ba funsionáriu públiku no kontratadu sira hotu, sei hela hotu iha uma no la presiza halo servisu iha servisu fatin no bele halo servisu ka hala’o atividade profissionál iha ida-idak ninia uma via online, maibé nafatin mantein kontaktu sosiál hamutuk ho família”, hateten Ministru Fidelis iha Sentru Konvensaun Dili (CCD-sigla portugés).

Governante ne’e reforsa liután katak, funsionáriu sira hela iha uma la’ós atu pasiar ba iha fatin-fatin, maibé hela iha uma hodi kontrola família no oan sira hodi labele sai ba fatin-fatin no labele vizita malu.

“Autoriza hela iha uma la’ós feriadu, ne’ebé bele despensa no haree ba sira ne’ebé mak ho idade avansada iha perigu liu ba COVID-19 ne’e tanba ne’e sira hotu hela iha uma no halo servisu de’it husi uma. Bainhira hela iha uma halo esforsu hotu atu kontribui hodi luta hasoru COVID-19. Haree mós ba tinan avansadu hanesan 60 ba leten, ne’ebé sofre moras asma, respiratóriu, hirak ne’e tama iha kategoria vulneravél”, nia adianta.

Entretantu validasaun ba desizaun ne’e hahú iha tersa (24/03) no sei ramata bainhira situasaun ba COVID-19 laiha ona.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here