Primeiru-Ministru, Taur Matan Ruak, Prezide Reuniaun Konsellu Ministru Extraordinária iha Sentru Konvensaun Dili, segunda (23/03). Imajen Tatoli/Egas Cristovão

DILI, 23 marsu 2020 (TATOLI) Governu liuhosi reuniaun Konsellu Ministru (KM) aprova proposta orsamentu adisionál hodi sosa ai-moruk ba kazu COVID-19, nu’udar medida prevensaun.

Ministru Reforma Lejizlativa Asuntu Parlamentár, Fidelis Manuel Leite Magalhães, informa iha reuniaun ezekutivu, Vise-Ministru Saúde, Bonifásio dos Reis, aprezenta situasaun kona-ba atividade preparasaun sira ba kombate COVID-19.

Biban ne’e hato’o mós proposta orsamentu adisionál ba akizasaun ai-moruk nu’udar medida prevensaun nian, ne’ebé sei kontribui mós sosa materiál.

“Ministériu Saúde (MS) inklui Ministériu Negósiu Estranjeiru no Kooperasaun (MNEK) aprezenta proposta ida no iha proposta ne’e Ministériu Saúde aprezenta pakote ida ho montante millaun $3 to’o millaun $4. Biban ne’e MNEK aprezenta tan pakote ida ho totál másimu millaun $11, ne’ebé sei uza osan ne’e bainhira iha nesesidade. Tanba ne’e ita fahe hodi halo kompra emediata no seluk tan bainhira nesesidade seluk mosu”, dehan Ministru Reforma Lejizlativa Asuntu Parlamentár, Fidelis Manuel Leite Magalhães, hafoin reuniaun ezekutivu iha Sentru Konvensaun Dili (CCD-sigla portugés), segunda ne’e.

Governante ne’e esklarese liután, orsamentu millaun $11 prepara atu sosa ekipamentu adisionál no sasán sira, inklui proposta emediata millaun $3 atu sosa uluk buat sira ne’ebé konsidera urjente atu reforsa liután ai-moruk ne’ebé maka iha.

“MNEK aprezenta proposta ida nu’udar rezultadu  servisu durante ne’e no halo ona kontakta ho nasaun amigu sira hanesan Xina, Austrália no Kuba atu disponível apoia Timor-Leste. MNEK rasik aprezenta proposta atu bele halo akizasaun lalais hodi reforsa liután ita-nia ai-moruk no reforsa liután ita-nia ekipamentu nesesáriu, nune’e ajente saúde sira bele uza ai-moruk ne’ebé ita sei husu”, nia akresenta.

Tuir governante ne’e, importante tebes hodi bele halo prevensaun ba Coronavírus, tanba komunidade sira konsiente katak ai-moruk atu kura laiha, tanba ne’e presiza sosa ai-moruk hodi ajuda redús sintoma vírus ne’e.

Jornalista: Antónia Gusmão

Editora: Julia Chatarina

1 KOMENTÁRIU

  1. Muito parabens i obrigado ba Nai Ulun sira Nia laran luak nb aprova orsamento suficiente hodi responde ba necesidades MS nb halao atividade Contra Virus Corona 19 iha Timor

HAKEREK NO HATÁN

Please enter your comment!
Please enter your name here