Vigário Episkopál Pastorál Dioseze DIli, Juvito Rego, akompaña husi Diretór Jerál Turizmu, José Filipe Dias Quintas. Imajen Tatoli/Florencio Miranda Ximenes

DILI, 23 marsu 2020 (TATOLI) – Ministériu Turizmu, Komérsiu no Indústria (MTKI) no Dioseze Dili deside taka provizóriu sítiu Na’in-Feto Ramelau ba vizitante sira hodi evita sidadaun sira husi COVID-19.

Vigário Episkopál Pastorál Dioseze Dili, Juvito Rego, hateten insiativa MTKI ho parte Igreja ne’e ho objetivu atu salva sarani sira husi pandemia globál COVID-19.

“Ita haree vizitante ba sítiu santuáriu sira ne’e ema barak, tanba ne’e MTKI hamutuk ho Igreja atu apela ba komunidade sira atu hapara vizita ba satuáriu Ramelau lai”, tenik Amo Juvito liuhosi konferénsia impresa iha Episcopál Dili, segunda ne’e.

Nune’e, Amo Juvito husu mós ba sarani sira atu hakmatek iha uma no halo peneténdia no orasaun de’it.

“Ita haree atividade boot liu mak Misa, maibé Misa no devosaun sira de’it mós para ona ne’ebé husu sarani sira tuur de’it iha uma no reza de’it Na’in-Feto rona ona,” Amo ne’e akresenta.

Amo Juvito mós fó hanoin ba Sarani sira katak hanesan iha país Itália nia mós ema ladún tuir orietasaun Sistema Saúde nia ne’ebé ema kuandu mate barak tan afetadu ho COVID-19 sira nia Governu hafodak.

“Ami husu atu sarani sira reza iha uma de’it no labele ba Ihreja, vizita fatin santuáriu sira ho rame tanba hetan da’et husi Coronavírus”, nia adianta.

Ho nune’e, Vigáriu Pastorál Dili ne’e dehan MTKI ho Dioseze Dili ho laran no fuan inklui Domin husu ba sarani sira atu tuur hamaktek no reza hodi salva nia vida.

Iha sorin seluk, Diretór Jerál Turizmu, José Filipe Dias Quintas, hatete MTKI koopera ho Dioseze Dili deside taka provizóriu vizita sítiu Na’in-Feto Ramelau atu evita ema konsentra barak iha fatin ida.

“Ohin, ita halo koordenasaun ho Dioseze Dili atu taka provizóriu ba sítiu turístiku relijiozu hanesan Na’in-Feto Ramelau husi vizitante ka turista doméstika atu bele hadook-an komunidade husi Coronavírus”,  nia akresenta.

José Quintas dehan, husi Parokia Fatu-Beliku, Ainaro nian mós komunika mai MTKI atu koopera ho Dioseze Dili atu apela ba komunidade tomak atu taka provizóriu sítiu Na’in-Feto Ramelau husi vizitante sira.

“Ita deside taka temporariamente to’o ita hetan informasaun ofisiál husi Ministériu Saúde katak infesaun Coronavírus laiha ona mak foin loke fali”, nia akresenta.

Diretór Jerál Turizmu ne’e subliña tan, parte tékniku haree ona katak presiza duni atu taka provizóriu sítiu relijiozu hodi evita movimentasaun komunidade sira.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here