Guteriano Neves

“Dezenvolvimentu sistema saúde públika labele konsidera de’it ba moras komum ne’ebé mak Timor kostume ona, maibé mós tenke prontu atu hatan ba situasaun pandemia sira hanesan agora; ne’ebé ninia orijin la’ós hosi Timor. Ida ne’e presiza investimentu iha área peskiza no dezenvolvimentu, troka informasaun no koñesementu entre Timor-Leste ho rai seluk mós no prontu atu servisu ho pais seluk”.

Hosi:

Guteriano Neves

Virus Korona sai referénsia boot ida ba Timor-Leste kona-ba inserteza oioin ne’ebé sei akontese iha futuru. Ho nune’e, presiza sistema polítika no Governasaun ida ne’ebé la’ós funsiona de’it iha tempu ordináriu, maibé mós atu responde ba dezafiu oioin ne’ebé mosu hosi situasaun sira hanesan mundu enfrenta hela.

Virus Korona, koñesidu Novel Coronavirus – COVID-19 – ne’ebé inisialmente orijin hosi Xina, deklara ona sai pandemia iha mundu hosi Organizasaun Mundiál ba Saúde (OMS). Katak, maior parte hosi mundu hetan ona impaktu hosi moras ne’e. Ida ne’e nu’udar fenomenu saúde públika mundiál, hamosu ona efeitu oioin hanesan ekonomia sosiál, no norma sira ne’ebé existe iha sosiedade nia laran; inklui interasaun entre membru sosiedade nian. Iha nivel sistema nian, COVID-19 interompe ona sistema báziku ne’ebé kesi mundu ohin loron nian bazeia ba Globalizasaun; no movimentu livre ema, kapitál, sasan no servisu sem fronteira hosi pais ida ba pais sira seluk. Komesa hosi Xina ba Mediu Oriente, hosi Eropa ba Kontenti Ázia Pasífiku, no mós iha Amerika Norte, pais sira komesa impoen ona regra oioin atu diskoraja ema atu labele halo movimentu iha rai-laran no mós ba rai-liur.

COVID-10 mós iha impaktu ekonomiku ne’ebé boot, no sei han tempu atu rekopera. Ekonomista balu komesa bolu ona situasaun atuál hanesan “Economic Recession” ka Recessaun Ekonomia; iha ne’ebé kreximentu ekonomiku negativu. Pais sira ne’ebé mak depende ba komersiu internasionál hanesan Xina sofre, tanba sira nia exportasaun tun drastikamente. Pais sira ne’ebé mak depende ba exportasaun servisu hanesan turizmu sofre boot, tanba nasaun hotu diskoraja ninia emar sira atu halo viajem internasionál. Bainhira ema la-halo viajem, pais sira ne’e ninia rendimentu tun drastikamente. Pais sira ne’ebé depende ba exportasaun rekursu petróleu, hanesan Timor-Leste, konsekuénsia ida ne’ebé mak sira sofre mak presu mina iha merkadu internasionál tun drastikamente; ate halo kompañia sira susar atu kobre sira nia kustu operasaun. Iha nivel mikro-ekonomia, autór-ekonomia iha setór oioin komesa sofre konsekuénsia hosi ne’e.

Kompañia Aviasaun Sivíl sira tenke sofre boot, tanba sira nia rendimentu tun drastikamente; sira tenke taka sira nia operasaun iha parte balu; rezultadu hosi ema la-halo viajem. Otelária sira lakon rendimentu, tanba ema menus mak ba toba iha otél. Lista ne’e bele kontinua.

Timor-Leste mós sofre ninia konsekuénsia bazeia ba ninia dinamika rasik. Maski to’o agora, dadus ofisiál ne’ebé fó sai seidauk iha konfirmasaun kona-ba kazu ruma iha rai-laran, maibé konsekuénsia ekonómika no sosiál hosi pandemia ne’e komesa sente ona. Hanesan fó sai hosi Banku Sentrál, analiza hosi Institutu La’o Hamutuk, Fundu Petróleu lakon kauza hosi movimentu merkadu finanseiru internasionál. Maski iha parte ida presu mina iha merkadu internasionál ne’ebé tun, afeita ba produsaun ne’ebé la’o hela iha Bayu Undan, maibé Timor-Leste sorte tanba produsaun iha Bayu Undan iha Trend ne’ebé tun ona, kompara ho tinan hirak liu-ba. Konsekuénsia ekonomiku seluk ne’ebé Timor-Leste sofre ona mak menus númeru vizitante hosi rai-liur. Hirak ne’e hotu sei afeta siklu atividade negosiu rai-laran nian; nune’e bele impaktu ba empregu, rendimentu, ema nia kapasidade kompra, no konsumu.

Maski ho notísia oioin ne’ebé fó sai kona ba impaktu oioin hosi Virus Korona, importante tebes atu la trata kazu Virus Korona nu’udar kazu izoladu ida iha istória umanidade nian. Klaramente, moras sira ne’ebé da’et hanesan Korona la’ós foun.

Foin dadaun, mundu mós hetan impaktu hosi moras da’et sira seluk hanesan SARS, gripe manu, no mós Ebola. Haree dook liu ba kotuk, iha 1918 Great Flu Pandemia hamate ema entre tokon 50 to’o 100 iha fulan balu nia laran de’it. Nu’udar moras ho karakteristiku pandemia, Korona la’ós buat foun iha istória umanidade nian. Maibé preokupasaun boot ne’ebé mosu katak Virus ida ne’e da’et lalais, fasilita ho movimentasaun ema-nian iha nasaun laran no mós ba rai-liur. Ida ne’e tau presaun signifikante boot ba sistema saúde públika; kondisaun psikolojia individuál no mós sosiedade. Aumenta tan ba ne’e, Moras ida ne’e foun, ninia sintomas sira kuaze hanesan ho moras sira seluk, ninia aimoruk seidauk iha no mós vaksina seidauk iha.

Pais dezenvolvidu sira de’it mós, nia ospital enfrenta dezafiu boot atu hatan ba númeru pasienti ne’ebé aumenta ho barak no lalais. Ho informasaun ne’ebé pasa lalais, kuaze iha sekunda nia laran fasilita hosi teknolojia informasaun no mídia sosiál, kria pániku ba sosiedade tomak. Konsekuénsia hosi pániku ida ne’e mak ba ekonomia inklui presu sasan iha merkadu sa’e derepenti bainhira laiha kontrola hosi Governu nu’udar reguladór. Simplismente, moras ida ne’e sai ameasa boot ba moris lor-loron sosiedade nian.

Hanesan Organizasaun Mundiál ba Saude – OMS – fó sai, kestaun ba Timor-Leste la’ós atu tama ka la’e, maibé bainhira mak tama. OMS mós fó hanoin katak erro boot ida ba Governu sira halo asumsaun katak moras ne’e sei la de’it ba sira nia rain. Bazeia ba asumsaun ida ne’e, públika nia preokupasaun atuál mak kapasidade ita nia sistema saúde públika  atu hatan ba situasaun ne’ebé mosu ho Virus Korona. Iha kontextu hanesan ne’e, preokupasaun boot liu mak sistema saúde públika la iha kondisaun sufisienti atu hatan ba presaun oioin ne’ebé sei mosu mai. Entaun ninia impaktu sei maka’as entermu ema nia vida.

Independentimente hosi preokupasaun ohin loron nian no mós disrupsaun ba norma sosiál kauza hosi Virus Korona, istória mundu nian hatudu katak, kleur ou lalais, mundu sei hamutuk lori ultrapasa situasaun ida ne’e. Ho koñesementu no peritu iha área oioin, esperiénsia ne’ebé liu ona ho pandemia oioin, teknolojia saúde no informasaun ne’ebé avansadu tebes, mundu sei ultrapasa situasaun ida ne’e. Maski barak enfrenta hela dezafiu oioin atu kontrola virus ne’ebé da’et lalais, no disrupsaun oioin kauza hosi Virus Korona, pais balu iha Ázia hatudu ezemplu di’ak. Xina konsege hatudu ho polítika  ne’ebé forte no determinadu, sira konsege kontrola virus ne’e ninia da’et. Nune’e mós Korea Sul, Taiwan no Singapore hatudu prevensaun inisiál no responde ho lalais nu’udar meius atu evita presaun ne’ebé mosu ba sistema saúde públika. Esperiensia sira ne’e sai ona lisaun ba pais sira seluk atu hatan ba situasaun ne’e. Nune’e, iha konfiansa katak mundu sei ultrapasa situasaun ida agora.

Importante liu mak situasaun ne’ebé mundu enfrenta hela, no preokupasaun oioin ne’ebé Timor enfrenta hela agora, fó hanoin mai ita kona-ba dezafiu Governasaun iha mundu globalizadu. Governasaun iha ámbitu ida ne’e iha ninia definisaun ne’ebé luan liu; refere ba organizasaun sosiedade nian lori atinje objetivu komum ida liu hosi polítika públiku no asaun sira. Papel atu governa labele ses hosi papel Estadu, tanba nu’udar instituisaun polítiku ne’ebé aas liu atu organiza sosiedade. Estadu mak iha autoridade aas liu atu defini polítika públiku no organiza sosiedade iha ninia juridisaun.

Dezafiu ne’ebé Estadu enfrenta iha mundu globalizadu ohin loron mak papel atu Governa la limita de’it ona ba kestaun rai laran, maibé mós prontu atu responde ba dezafiu sira seluk ne’ebé karik mosu hosi rai seluk. Moras Korona hanesan ezemplu ida hosi dezafiu refere. Ida ne’e nu’udar dezafiu Governasaun iha mundu globalizadu, iha ne’ebé ema, sasan, servisu, kapitál no informasaun fasilmente atu sai hosi fatin ida ba fatin seluk ho lalais. Ida ne’e rekere kapasidade lideransa ida ne’ebé prontu atu halo desizaun difísil balu maski dala ruma kontra opiniaun maioria tempu difísil hanesan ne’e, no mós forsa sosiedade nian tomak atu hamutuk maski iha differensa iha afiliasaun polítika, relijiaun, rasa, no seluk tan.  Tuir tan, dezafiu seluk ba Governasaun iha mundu globalizadu mak situasaun iinserteza. Mudansa iha aspetu ida sei da’et ba aspetu seluk, nune’e presiza kapasidade Estadu nian atu responde ho lalais. Situasaun sira hanesan ne’e sai ona normál iha mundu ida ne’ebé interligadu ohin loron nian.

Pandemia Korona mós lori ita atu hanoin fila fali kona-ba kestaun importante lubuk ida ne’ebé durante ne’e sai hanesan preokupasaun públiku iha rai-laran, kona ba estratejia dezenvolvimentu rai-laran. Ida mak dezenvolvimentu sistema saúde públika  rasik atu responde ba situasaun emerjénsia no pandemiku hanesan agora. Atu hateten ba oin, dezenvolvimentu sistema saúde públika labele konsidera de’it ba moras komum ne’ebé mak Timor kostume ona, maibé mós tenke prontu atu hatan ba situasaun pandemia sira hanesan agora; ne’ebé ninia orijin la’ós hosi Timor. Ida ne’e presiza investimentu iha área peskiza no dezenvolvimentu, troka informasaun no koñesementu entre Timor-Leste ho rai seluk mós no prontu atu servisu ho pais seluk.

Ho efeitu oioin kauza hosi  COVID-19 mós provoka ita atu hanoin mós diskusaun sira iha rai-laran kona-ba dezenvolvimentu ekonomia, dependensia ba petróleu, no mós diversifikasaun ekonomia. Impaktu ekonomiku hosi COVID-19 boot tebes, no afeita setór ekonomia hotu iha mundu. E Ida ne’e la’ós buat foun ba ekonomia mundiál hasoru Economic Recession hanesan agora. Maibé importante ba Timor-Leste mak atu konsente katak dependensia ba setór ùniku la saudavel, tanba iha iha risku boot. Nune’e mós karakteristiku seluk hosi ekonomia mundiál nian ohin loron mak “inserteza” tanba lalaok ekonomia nian nunka bele ses hosi dinamika polítika, seguransa, no mós ambiental. Timor-Leste tenke prontu hela de’it atu responde iha situasaun sira hanesan ne’e.

Ikus liu, Pandemia hanesan agora dadaun provoka ita atu hanoin fila fali konseitu “Seguransa Umanu” Human Security no ita nia aproximasaun ba defeza no seguransa mundu globalizadu nian. Iha mundu loron, ameasa ba vida ema nian la’ós mai ona hosi funu konvensionál ne’ebé uza kilat ho forsa militár. Ameasa ba nasaun kiik sira hanesan Timor mak kestaun mudansa klimátika, moras oioin ne’ebé mai hosi rai-laran no hosi rai-liur, impaktu mudansa iha ekonomia mundiál, no seluk tan. Virus Korona hanesan ezemplu ida hosi ezemplu oioin ne’ebé sai hamosu ameasa boot ba ema nia vida, no ninia efeitu ba ema nia seguransa ekonomiku, tanba ema barak bele lakon servisu, fontes rendimentu, ema nia konsumu, seguransa alimentár, kondisaun psikolojia kada ema-nian, no ema-nia liberdade atu halo movimentu. Tanba ne’e, importante tebes atu subliña seguransa ema-nian iha mundu ohin loron la limita ona ba aproximasaun konvensionál ne’ebé bazeia de’it ba forsa ho kilat. Seguransa Umanu ohin loron haree iha kontextu ne’ebé luan liu; haree liu ba ema nia seguransa iha aspetu sosiál no ekonomia. Tanba ne’e, nu’udar pais ne’ebé liu hosi istória naruk ho konflitu, bainhira ita ko’alia kona-ba seguransa, defeza, pás no estabilidade, ita la koalia de’it kona-ba seguransa no sentidu konvensionál nian, no laiha violénsia fíziku, maibé haree mós ba aspetu sosiál no ekonomiku. Ida ne’e tenke iha mós implikasaun sira ba ba estratejia polítika, dezenvolvimentu nian ne’ebé foka ba setór sosiál no setór ekonomia sira ne’ebé iha impaktu direta ba sidadaun nia-moris.

**********

COVID ne’ebé deklara ona sai pandemia da’et ona ba ema 200,000 resin, no hamate ona ema rihun nen resin iha mundu. Ninia mós interompe ona sistema baziku ne’ebé kesi sosiedade barak nia interasaun. Maski nune’e, aprende hosi istória umanidade nian, iha konfiansa katak lalais ou neneik, mundu sei ultrapasa. Importante ba Timor-Leste mak ho preokupasaun oioin ne’ebé mak agora mosu, tenke sai ona referénsia ba ita atu hanoin kona ba dezafiu ba Estadu nu’udar instituisaun ne’ebé iha autoridade aas liu atu Governa sosiedade, dezenvolvimentu saúde públika, no mós modelu dezenvolvimentu ba oin.

Autór nu’udar Peskizadór no Analista Polítika Públiku Timor-Leste nian. Artigu ida ne’e nu’udar opiniaun pesoál, no la reprezenta instituisaun ka ajensia ruma ne’ebé autór afilia ba.  

HAKEREK NO HATÁN

Please enter your comment!
Please enter your name here