Konsellu Diretivu inklui Funsionáriu Administrasaun no Jornalista Agência TATOLI,IP, bainhira retiru iha Marobo. Imajen TATOLI

DILI, 23 marsu 2020 (TATOLI) – Konsellu Diretivu Agência TATOLI,IP-Ajénsia informasaun ofisiál Estadu Timor-Leste, liuhosi reuniaun ekstra-ordináriu tuir kompoténsia Konsellu Diretivu nian, artigu 13, husi dekretu lei nú. 21/2017, 24 maiu, aprova ho unanimidade ba protokolu no medida preventiva ba funsionáriu administrasaun no jornalista TATOLI nian iha luta hasoru surtu COVID-19, hahú 23 to’o 27 marsu.

Medida preventiva ba funsionáriu administrasaun no jornalista TATOLI mak kumpre prátika ijiéne ne’ebé Ministériu Saúde (MS) no Organizasaun Mundiál Saúde (OMS) nian fó sai ona iha Timor-Leste.

Hahú prátika distánsia sosiál ho mínimu metru ida, bainhira tuur ka hamriik iha serbisu fatin ka hala’o entrevista ho fonte sira no evita halo kontaktu fíziku durante hala’o misaun serbisu nian.

Limita reuniaun ho membru iha grupu boot bainhira la presizano se nesesáriu duni atu konvoka, sei aplika prátika distánsia metru ida iha tuur fatin durante prosesu reuniaun nia laran.

Bainhira sente katak kondisaun saúde ladun permite, informa ba superiór no labele mai serbisu fatin.

Atu hemu kafé, fui bee ka foti hahán ruma iha dapur (koziña) husu atu idaidak bele foti no labele fó ba malu hodi kumpre nafatin prátika ijiéne ne’ebé fó sai husi MS no OMS iha Timor-Leste.

Ba vizitante sira mai edifísiu TATOLI,IP, tanba lori karta ka jornál ruma, autoriza atu husik de’it karta ka jornál hirak ne’e iha fatin ne’ebé ekipa administrasaun prepara ona, sein iha kontaktu fíziku ho pesoál TATOLI nian sira.

Ba elementu kompañia nian ruma lori sasán ruma mai TATOLI, sei kumpre no aplika distánsia sosiál no sasán hirak ne’ebé mak lori, autoriza atu husik de’it iha fatin ne’ebé ekipa lojístika sira indika ona sein iha kontaktu fíziku ho pesoál TATOLI nian sira.

“La’ós ona segredu ba públiku katak jornalista sira no mós mediku sira iha kedas filleira oin kuandu sira públika, asesu informasaun. Vida jornalista sira nian importante liuliu iha périodu sira ne’ebé ita-nia nasaun hasoru situasaun emerjénsia, iha périodu sira ne’ebé ita-nia nasaun luta hasoru surtu COVID 19. Ohin dadersan iha TATOLI iha reuniaun Konsellu Diretivu, ami hahú hasai deliberasaun importante ida,” Prezidente TATOLI, IP, José da Costa ba jornalista sira iha edifísiu TATOLI, IP, Farol, Dili, segunda (23/03/2020).

“Deliberasaun ida ne’e atu estabelese protokolu no medida preventiva ba jornalista sira no mós funsionáriu sira iha TATOLI,” reforsa tan ezekutivu TATOLI ne’e.

Iha fatin hanesan, Vise-Prezidente TATOLI, IP, Manuel Pinto hateten katak hanesan jornalista tenke hatene halo medida prevensaun ba nia-an rasik bainhira halo serbisu.

“Hanesan ita hotu hatene, tenke iha sasán sira ne’ebé presiza hatene hanesan standar (padraun) WHO (Organizasaun Mundiál Saúde, sigla inglés) nian. Ha’u hanoin media sira iha responsabilidade ba ida ne’e atu tau no suporta materiál sira ne’e ba jornalista sira nune’e jornalista sira hala’o sira-nia atividade ne’e konsentra de’it ba iha buka no rekolla informasaun,” Vise Manuel Pinto hateten.

Padraun OMS ba prevene pandemia COVID-19 maka fase-liman ho sabaun no bee ka uza desinfentante alkool, bainhira me’ar no fani taka inus no ibun uza lensu ka liman sikun, evita hakbesik ba ema sira ne’ebé mak iha síntoma ka flu, te’in na’an manutolu to’o tasak no mós labele hakbesik ba animál fuik sira ne’ebé mak ita haki’ak sein iha protesaun.

Entretantu, antesipa pandemia COVID-19, Agência TATOLI,IP, antes ne’e mós konvida OMS mai iha edifísiu TATOLI,IP nian hodi partilla informasaun kona-ba surtu COVID-19 ne’e ba jornalista no funsionáriu TATOLI,IP tomak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here