Prezidente Republika,Imajen/Media PR

DILI, 23 marsu 2020 (TATOLI)–Aban, tersa (24 marsu 2020), Xefe Estadu, Francisco Guterres “Lú Olo”, sei prezide reuniaun Konsellu Superior Defeza no Seguransa (KSDS) no Konsellu Estadu hodi rona membru sira-nia hanoin kona-ba pedidu husi Governu atu deklara Estadu Emerjénsia.

Komunikadu ne’ebé fó sai husi Prezidénsia Repúblika hateten, Reuniaun Konsellu Superior Defeza no Seguransa nian sei hahú tuku 9.00 dadeersan no Konsellu Estadu sei hahú tuku 11.00

Reuniaun atu Diskute Estadu Emerjénsia ne’e tanba, haree ba moras foun husi Coronavirus ne’ebé da’et lalais husi ema ba ema iha mundu tomak no halo ema barak moras no mate ona, no tamba simu ohin pedidu husi Governu atu deklara Estadu Emerjénsia, Prezidente Repúblika konvoka, ho karáter urjénsia, membrus hotu-hotu ne’ebé halo parte Konsellu Superior Defeza no Seguransa no Konsellu Estadu.

Estadu Emerjénsia signifika katak sei iha medida ne’ebé sei limita ka supende direitu balun liberdade balun no garantia balun ne’ebé Konstituisaun fó ba sidadaun sira.

Governu hanoin katak ho medida sira ne’e mak ita bele kombate no hamenus moras ne’e da’et husi ema ba ema, iha Timor-Leste.

Komunikadu ne’e hateten mós katak, hafoin rona ona opiniaun husi membrus Konsellu Superior Defeza no Seguransa no Konsellu Estadu no haree katak presiza halo duni Deklarasaun Estadu Emejénsia, Prezidente Repúblika sei husu autorizasaun husi Parlamentu Nasionál, liuhusi Mensájen ida.

Karik Parlamentu Nasional aprova, Prezidente Rpúblika sei deklara Estadu Emerjénsia liuhusi Dekretu Prezidensial.

Ohin, segunda (23 marsu 2020), molok tuku ida, mak Prezidente Repúblika simu pedidu husi Governu atu halo Deklarasaun Estadu Emerjénsia.

Prezidente Repúblika, iha ninia mensajen ba povu tomak, iha 20 marsu, tuku tolu lokraik, husu ba instituisaun hotu-hotu Estadu nian no sosiedade tomak atu fó liman ba malu atu prevene no kontrola moras husi koronavirus.

Timor-Leste, liuhusi Ministra Saúde, deklara ona katak iha ema na’in-ida ne’ebé hetan ona moras husi koronavírus.

Membru Konsellu Superior Defeza no Seguransa ne’ebé sei partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres.

Hosi Parlamentu Nasionál, Aderito Hugo da Costa, David Dias Ximenes, Abel Pires da Silva, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, Diretór Jerál Servisu Intelijénsia Manuel Serrano, José Manuel Fernandes ‘Nakfilak’, Cristina da Silva no sei konvida Eis Primeiru Ministru no Ministru Saúde Rui Araújo no Infectologista Danina Coelho no Diretór Ezekutivu FONGTIL Daniel Santos.

Membru Konsellu Estadu ne’ebé sei partisipa iha reuniaun ne’e mak Prezidente Repúblika Francisco Guterres Lú Olo, Primeiru-Ministru Taur Matan Ruak, Eis Prezidente Repúblika sira, Prezidente Parlamentu Nasionál Arão Noe.

No mós membru ne’ebé nomea husi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea husi Parlamentu Nasionál: Eduardo de Deus Dusae’, Aurora Ximenes, José Cornelio Guterres, Árcangelo de Jesus Gouveia Leite, José dos Santos ‘Naimori Bucar’.

Notísia Relevante: Semana Oin, Governu Submete Proposta Estadu Emerjénsia ba Prezidente Repúblika

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here