Coronavirus

DILI, 22 2020 (TATOLI)-Diretór Ezekutivu Forum Organizasaun Noun Governamentál Timor-Leste (FONGTIL), Daniel dos Santos Carmo, husu ba Timoroan hotu atu servisu hamutuk hodi prevene pandemia mundiál hanesan coronavirus ka COVID-19 iha Timor-Leste.

Timor-Leste hahú deteta ona kazu COVID-19 ida, nia dehan haree ba rekursu umanu no fasilidade limitadu tanba ne’e maka hotu-hotu tenke kolabora no servisu hamutuk la’ós kna’ar Ministériu Saúde nian de’it.

“Situasaun ida ne’e ejize Timoroan hotu nia responsabilidade atu tau forsa hamutuk hodi luta hasoru pandemia corona virus nian,”katak, Diretór FONGTIL, durante konferénsia imprensa, domingo (22/03/2020), iha Caicoli Dili.

Nia mós apoiu desizaun MS hodi implementa kuarentena obrigatóriu ba sidadaun hotu durante loron 14 bainhira fila hosi rai-liúr. Nune’e mós governu tenke prepara fasilidade iha ospitál no sentru saúde atu atende komunidade sira bainhira identifika.

Iha parte seluk, Dirijente FONGTIL ne’e husu ba komunidade iha atu labele boikota programa Ministériu Saúde liliu estabelesimentu fatin Kuarentena iha Tibar, Munisípiu Liquiça, fatin izolamentu iha Sentru Saúde Vera Cruz no Fatin Internamentu ba Coronavirus iha Sentru Saúde Formosa.

“Husu ba ita hotu katak lalika pániku no hakfodak ba ameasa husi epidemia coronavirus tanba pániku perigu liu. Ho paniku no tauk ita sei la kuidadu an no la kuidadu ita-nia família,”tenik Daniel.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here