Sekretáriu Estadu Komunikasaun Sosiál, Merício Juvinál dos Reis ‘Akara’, akompaña ho Xefe Gabinete, Júlio Gonçalves, fase liman iha loja Lita Store, hafoin haree direita Stock ai-han iha loja sira. Imajen Tatoli/ Florencio Miranda Ximenes

DILI, 22 marsu 2020 (TATOLI) – Lita Store hahú kria fatin fase liman iha loja oin, molok Ministériu Saúde (MS) anúnsia deteta kazu dahuluk ema-na’in ida pozitivu COVID-19 iha Timor Leste.

Loja-Na’in Lita Store, Foo Hu Hiun, hateten inisiativa kria fatin fase liman ho sabaun ne’e atu prevene sirkulasaun COVID-19 husi kompradór sira.

“Ami kria fatin fase liman ne’e atu kompradór sira  bainhira mai tenke fase liman hafoin tama ba loja laran hodi sosa sasán ruma”, nia dehan ba Agência Tatoli, domingu ne’e.

Ho nune’e, Loja-Na’in husu ba kliente ka kompradór sira bainhira atu mai hola sásan ruma presiza fase liman atubele hadook-an husi virus ne’e.

“Ami halo durante semana ida ona, molok Ministériu Saúde anunsia deteta ema-ida pozitivu COVID-19”, nia akaresenta.

Iha sorin seluk, kompradora Maria Ximenes agradese ho inisiativa Lista Store ne’ebé fasilita fatin fase liman atu fase hafoin tama ba loja.

“Ida-ne’e importante tebes atu ita ida-idak prevene-an husi virus a’at ne’e”, nia salienta.

Kompradór ne’e mós husu loja sira seluk iha kapitál Dili atu kria mós fatin fase liman atu fó saúde di’ak ba kompradór seluk nune’e bele prevene COVID-19.

Jornalista: Florencio Miranda Ximenes

Editora: Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here