Komunidade aldeia Iralafai uza lampada, lilin hodi lalin jerigen ho bote ba kuru bee iha fatuk laran e la'o ain ho metru 70 ho nakukun. Foto TATOLI/Zezito Silva

DILI, 21 marsu 2020 (TATOLI)—WaterAid Timor-Leste apelu asaun urjente husi Governu Timor-Leste no komunidade internasionál atu inklui bee no saneamentu seguru iha sira-nia planu hodi enfrenta impaktu husi mudansa klimátika.

Atuálmente populasaun besik 300,000- 22% iha Timor-Leste seidauk iha bee bomba báziku ka bee moos besik sira nia uma, no situasaun ida ne’e halo susar tebes sira atu enfrenta impaktu husi mudansa klimátika ne’ebé kontinua sai ameasadu.

“Ema hotu presiza bee atu moris. Asegura katak ema hotu iha bee-matan seguru ne’ebé dependente ba iha kualkér iklima, ida ne’e hanesan defeza vital dahuluk hodi kontra mudansa klimátika ne’ebé kontinua sai ameasadu. Impaktu imediata no komún bele sente liuhosi bee–rai maran makaas, mudansa iha volume tasi, inundasaun no anin-boot akompaña ho udan-boot no rai lakan, buat hirak ne’e hotu sai ameasadu ba ema atu asesu ba bee seguru,” dehan Diretór País WaterAid Timor-Leste, Justino da Silva, liuhosi komunikadu imprensa ne’ebé Ajénsia TATOLI asesu, horisehik.

Nota ne’e haktuir, WaterAid apelu ba Timor-Leste atu inklui planeamentu oinsá bele fornese serbisu agua no saneamentu ligadu ho reziliensia klimátika iha Kontribuisaun Determinada Nasional ka NDC (Nationally Determined Contribution) – dokumentu ne’ebé prodús husi Akordu Paris konabá Alterasaun Klimátika ka Paris Agreement on Climate Change – no iha ninia Planu Adaptasaun Nasional. Ida ne’e estabelese baseline ba nasaun ne’ebé bele dezenvolve fonte ba asesu global finansiamentu klimátika.

“Timor-Leste sai hanesan nasaun ba dala 25 vulneravel ba mudansa klimátika, entre 15% iha mundu, simu $25.80 kada ema, kada tinan iha fundu klimátika nian. Ida ne’e atu halo mitigasaun, utiliza ba redusaun emisaun karbonu no adaptasaun hodi redús impaktu alterasaun klimátika,” nota ne’e hateten.

Enkuantu, nota ne’e haktuir, nasaun sira ne’ebé ladún kontribui ba emisaun global, sira mak la preparadu atu hasoru efeitu sira, tan ho orsamentu ki’ik oan ne’ebé aloka ba asuntu refere atu ajuda sira.

“Médiu husi totál ema iha Timor-Leste akuntavel ba emisaun 0.4 tonelada métriku karbonu dióksidu tinan-tinan, kompara ho emisaun ba kada kapita médiu iha Estadus Unidus ho emisaun 16.5 tonelada métriku,” nota ne’e dehan.

Relatóriu hosi WaterAid ne’e haktuir, iha mundu tomak populasaun besik millaun 800 mak la asesu ba bee-moos besik iha sira-nia uma, enkuantu ema hamutuk billaun rua la asesu ba bee ne’ebé livre husi kontaminasaun, ne’ebé bele fó risku maka’as ba sira kona-ba moras transmitidu husi bee no kauza mate.

Iha 2050, estimasaun númeru populasaun enfrenta problema atu asesu ba bee maizumenus fulan ida dala ida, bele aumenta ba billaun lima iha mundu tomak, 50% husi totál populasaun globalmente.

Asesu ba bee-moos ne’e partikulármente vulneravel tebe-tebes tanba alterasaun klimátika aumenta presaun kona-ba rekursu bee ne’ebé trasa tiha ona ho infraestrutura ne’ebé la adekuadu, jestaun rekursu bee ne’ebé la di’ak no menus orsamentu ka fundu husi governu.

“La iha ema ida bele moris sem bee-moos. La iha ema ida bele moris di’ak se sira tenke luta hodi hetan ida ne’e. Maibé agora daudaun, ita-nia alterasaun klimátika difikulta ema mak moris iha nasaun probreza sira iha mundu ne’ebé daudaun ne’e luta hela atu hetan bee-moos,” dehan Diretór País WaterAid Timor-Leste, Justino da Silva.

Tuir nia, WaterAid nia relatóriu hatudu katak fundu uitoan loos gasta hodi ajuda ema vulneravel sira ne’ebé halo adaptasaun ba impaktu husi mudansa klimátika ne’ebé fo risku ba saúde no ema millaun resin nia moris.

“Governu tenke rekoñese ninia papél importante ba bee-moos hodi ajuda populasaun sira ba reziliensia alterasaun klimátika no serbisu atu responde ameasa urjente agora, nune’e ita-nia futuru jerasaun sira bele moris ho seguru no saudavel,” nia dehan.

Jornalista : Osória Matrques

Editór     : Cancio Ximenes

HAKEREK NO HATÁN

Please enter your comment!
Please enter your name here