Máskara mihis ne’ebé fa’an iha loja balun iha Munisípiu Liquiçá ho folin sentavu 0,50. Imajen Tatoli/Evaristo Soares Martins

LIQUIÇÁ, 22 marsu 2020 (TATOLI) – Relasiona ho COVID-19 ne’ebé hetan ona kazu pozitivu ida iha Timor-Leste, daudaun ne’e iha loja sira hahú fa’an máskara, balun ho folin normál no balun hasa’e folin.

Komersiante Xinés sira iha Munisípiu Liquiça fa’an máskara mahar ho folin $1 no mihis ho folin sentavu 0,25.

Na’in ba Loja AKU (empreza Xinés), Fátima Lourdes, hateten máskara ida ho folin $1 ne’e la’ós foin mak agora maibé antes ne’e fa’an hanesan ne’e.

“Ami fa’an máskara ne’e antes kedas $1, la’ós foin mak agora, ita atu manipula mós hanesan de’it tanba ita fa’an ba maluk timór-oan hotu”, dehan Komersiante ne’e ba Agência Tatoli, iha Aldeia Nartuto, Suku Maumeta, Postu Administrativu Bazartete, Munisípiu Liquiçá, domingu ne’e.

Feto timór-oan ne’ebé kaben ho Xinés ne’e hateten, folin nesesidade bázika sira seluk la’o ho normál.

Tuir informasaun ne’ebé Agência Tatoli rekolla hosi traballadór timór-oan ne’ebé serbisu iha loja Yuyuciao Xiao, hateten folin máskara ne’e depende ba orientasaun hosi patraun.

Loja ne’e lokaliza iha Aldeia Leopa, Suku Dato, Postu Administrativu Liquiça Vila (besik Igereja Protestante).

Nune’e mós, Loja 1388 Tichilan, Unipessoal Lda fa’an máskara mihis ho folin sentavu 0,25 maibé oras ne’e komunidade hola hotu ona.

Loja ne’e lokaliza iha Aldeia Leopa, Suku Dato, Postu Administrativu Liquiçá Vila.

Enkuantu Loja Lazy Zhiqiang, Lda fa’an máskara diferensa tanba máskara mahar folin sentavu 0,50 no máskara mihis sentavu 0,25.

“Iha ne’e ami fa’an máskara mahar ho folinsentavu 0,50 no mihis ne’e sentavu 0,25. Ami-nia loja ne’e la manipula hanesan iha Dili ne’e”, hateten Xinés ne’ebé lakohi temi nia naran maibé loja naran Lazy Zhiqiang.

Loja refere lokaliza iha Suku Maumeta, Postu Administrativu Bazartete (besik Loja Timor Telekom).

Entretantu, Joven Roberto dos Santos Lopes hosi Aldeia Leopa, Bairro Kalora, Postu Administrativu Liquiçá Vila, husu Governu atu halo observasaun direita ba loja Xinés sira tanba balun fa’an máskara ho folin sentavu 0,50 no balun fa’an $1.

Observasaun seluk ne’ebé Agência Tatoli nota iha terrenu katak, folin fós kilograma 25 iha Munisípiu Liquiça sa’e sentavu 0,50, nune’e sai $11,50 (antes ne’e $11) no fós kilograma 20 ho folin $9,50 (antes ne’e $9).

“Fós kilograma 20 ne’e ami fa’an $9,50, uluk $9, folin sa’e foin lalais ne’e sai sentavu 0,50 de’it, kilograma 25 mak $11,50, Globus kilograma 30 ami fa’an ba $14, antes ne’e ami fa’an $13,50. Ida ne’e ami fa’an tanba sura ho karreta nian mak ne’e hotu”, informa Na’in ba Loja Bico, Justa Mendes ba Agência Tatoli, iha merkadu Liquiçá, ohin.

Loja Bico ne’e lokaliza iha merkadu sentrál Liquiça, suku Maumeta, Postu Administrativu Bazartete, Munisípiu Liquiçá.

Entretantu Xefe Suku Maumeta, Postu Administrativu Bazartete, Victor da Costa, rekoñese máskara ida kiik ne’e sira fa’an sentavu 0,25 no ida mahar ne’e ho $1.

Xefe Suku ne’e realsa, kona-ba folin fós iha merkadu Liquiçá folin normál hela.

“Antes ne’e sira fa’an hanesan ne’e. Ami hanesan autoridade lokál sei kontinua monitoriza folin mascara no folin fós ne’e, tanba ne’e ha’u fiar sira sei la hasa’e folin”, dehan Xefe Suku Maumeta ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here