Ministra Edukasaun, Juventude no Desportu Dulce de Jesus Soares. Imajen/TATOLI

DILI, 22 marsu 2020 (TATOLI)-Governu Konstitusionál Da-ualuk, liuhosi Ministra Edukasaun Juventude no Desportu (MEJD), Dulce de Jesus Soares, domingo (22/03/2020), ohin ofisialmente hodi fó feriadu extraordináriu ba estudante hosi eskola públiku no privada iha Territóriu Timor-Leste hodi feriadu durante semana ida hahú loron 23 to’o 28 fulan-marsu ba prevene coronavirus.

MEJD foti desizaun ne’e hafoin konsulta ho Gabinete Primeiru-Ministru, Taur Matan Ruak, relasiona ho kazu COVID-19 ne’ebé dadaun ne’e deteta ona iha Timor-Leste.

“Ohin loron 22 marsu 2020 Ministra Edukasaun, Juvetude no Desportu, determina feriadu extraordináriu hahú loron 23 to’o 28 marsu ba eskola hotu tantu eskola Públiku no privada ne’ebé integra iha rede eskola katóliku no fundasaun nian tuir despaixo Ministeriál nú 9/GM-MEJD/III/2020 hafoin koordena ho Gabinete Primeiru Ministru inklui Ministeriu Saúde,”katak Dulce de Jesus Soares ba jornalista sira durante konferénsia imprensa, domingo (22/03/2020) iha Salaun Enkontru MEJD, Villa-Verde Dili.

Desizaun ne’e atu fó tempu ba estudante sira hodi izola an iha ida-idak nia uma ho intensaun atu halo prevensaun ba COVID-19 tanba fásil atu da’et bainhira estudante sira konsentra hamutuk iha eskola.

Tanba ne’e maka Inan-Aman estudante sira tenke kontrola sira-nia oan atu evita halo movimentu iha fatin públiku durante feriadu.

“Atu enfazia katak férias eskolár semana ida ne’e la’ós atu halimar maibé atu hela iha uma no halo tuir padraun ijéne ne’ebé fo sai ona iha sirkular MEJD 3/2020 nian no regras ofisiál  sira husi Ministériu saúde nian,” tenik MEJD.

Atu evita COVID-19, Governante ne’e dehan, tenke fase liman beibeik, evita ka’aer liman, kumprementa malu liuhosi asaun rei malu, bensa liman no kontaktu fíziku seluk tan.

Entretantu, Governu sei halo fila-fali avalisaaun ba desizaun feriadu extraordináriu ne’e hodi fó sai ba públiku hafoin situasaun iha ona mudansa.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here