Otél Audian, Dili. Imajen/Cipriano Colo

BATUGADE, 22 marsu 2020 (TATOLI) -Ekipa Médiku Ministériu Saúde lori ona Timoroan hamutuk na’in 79 submete ba kuarentena provizóriu iha fatin própriu balun iha Dili laran durante loron 14 hodi akompaña sira-nia situasaun saúde molok fila-ba família ida-idak.

Notísia Relevante : Estudante Timoroan Na’in Rua Voluntáriu Husu Kuarentena

Otél Novo Horizonte, Dili. Imajen/Cipriano Colo

Timoroan na’in 79 ne’e, sábadu (21/03/2020), tama-mai Timor-Leste liuhosi fronteira terrestre, Postu Integradu Batugade. Husi sira-nee,  maioria estudante Timoroan ne’ebé hala’o sira-nia estudu iha universitáriu balun iha Indonézia, hanesan iha Bali, Malang, Jogjakarta, Jakarta, Bandung no Surabaya.

Iha mós Timoroan balun ne’ebé servisu hanesan traballadór iha Koreia du Súl no Scotland. Molok sira tama-mai to’o Dili, ekipa médiku-sira halo teste uza Infrared Thermometer hodi observa sira-nia kondisaun fíziku ka suhu temperatura la deteta sintoma COVID-19. Maibé, proseduralmente, sira tenke submete obrigatóriu ba kuarentena durante loron 14 nia laran.

Tuir observasaun Ajénsia Tatoli iha terrenu nota katak, Timoraon hirak-ne’e  hala’o viajen tama-mai hosi Fronteira Motain Indonézia liu-mai Fronteira Batugade.

Notísia Relevante : Governu Apela ba Estudante iha Rai-li’ur Prevene An hosi COVID-19

Sira-nia prezensa submete kedas ba teste médiku hosi ekipa Servisu Migrasaun no Médiku Jerál Ministériu Saúde no rekomenda ba sira  hotu atu tama iha fatin kuarentena provizoriu iha Batugade ne’ebé ekipa médiku sira prepara ona. Maibé, tanba kondisaun fasilidade saúde iha Merkadu Livre Batugade mínimu, liu-liu laiha sanitasaun no laiha fatin toba maka sira husu lori sira-mai kuarentena iha Dili.

Iha sábadu kalan, purvolta tuku 23:00 Otl, ekipa konjunta transporte kedas timoroan na’in 79 ne’e hosi Batugade mai too Dili iha tuku 1:00 madrugada,  hodi hela provizóriu iha Otél Audian, Dili  no balun ba hela iha Otél Novo Horizonte, Metiaut.

Fatin kuarentena provizóriu rua ne’e rasik hetan seguransa makaas hosi ekipa Polisía Task  Force Munisípiu Dili.

Notísia Relevante : TL-RI Taka Provizóriu Postu Integradu Fronteira Terrestre

Alzira Ximenes, Timoroan ne’ebé hala’o vizita ba família iha Kupang fila mai too Batugade, lamenta ho atendimentu ekipa médiku sira-nian iha fronteira Batugade la kria kondisaun atu bele submete sira iha kuarentena iha Batugade.

“Fatin kuarentena hanesan fatin rekreasi, tanba fatin kuarentena ne’e tuir loloos tenke iha fasilidade saúde kompletu. La’ós tuur iha lona okos hanesan fali atu hola-anin,” hateten Alzira ba jornalista horiseik iha Batugade.

Timoroan ne’e lamenta Ministériu Saúde la kria fatin di’ak ba instalasaun kuarentena iha Postu Integradu Batugade, nune’e hamosu dezentendimentu entre komunidade sira ho ekipa Servisu Migrasaun Batugade.

“Agora Mingrasaun haruka ami hela, maibé médiku sira dehan fatin la iha, agora ami atu fiar loos ba se. Tanba Corenavirus (COVID-19) ne’e moras aat, ita hotu prontu para atu koopera, maibé ita too mai atu hela iha kuarentena maka fatin la iha ne’e oinsá,” nia tenik ho dúvida boot.

Alzira husu ba Ministériu Saúde tenke servisu monta fasilidade adekuadu iha postu integradu Batugade hodi halo kontrolu másimu ba sidadaun timoroan ka estranjeiru-sira ne’ebé hala’o viajen tama-sai fronteira terrestre.

Tuir observasaun Ajénsia Tatoli nota mós katak, mezmu fronteira RDTL no Repúblika Indonézia taka ona, maibé movimentu sidadaun Timoroan mai hosi Atambua-Kupang kontinua tama mai Timor-Leste.

Jornalista : Eugénio Pereira

Editór       : Francisco Simões

1 KOMENTÁRIU

  1. Husu ba Ms atu halo kuarentena iha entrada sira laos ema tama mai lori sira lao lemolemo iha dili laran. Ne’e mak dehan MS halo prevensaun ba moras COVID-19

HAKEREK NO HATÁN

Please enter your comment!
Please enter your name here