Otél Novo Horizonte, Metiaut, Dili. Imajen Tatoli/Felicidade Ximenes.

DILI, 22 marsu 2020 (TATOLI)-Timoroan no ema estranjeiru hamutuk na’in 93, domingo (22/03/2020), tenke tama Kuarentena durante loron 14 iha Otél Novo Horizonte, Metiaút, Dili, hafoin fila hosi estranjeiru.

Diretóra Nasionál Kontrolu Doénsa, Josefina Clarinha João, via telefone ba TATOLI, ohin, katak, ema hirak ne’e foin fila hosi nasaun afetadu Coronavirus ka COVID-19, domingo ohin, ho aviaun Airnoth, Sriwijaya no Citilink.

“Pasajeiru hirak ne’e mai ho aviaun tolu mak hanesan Airnoth, Sriwijaya, no Citilink, no pasajeiru hirak ne’e hamutuk 93,” dehan nia.

Ekipa Vijilánsia observa kondisaun saúde husi sidadaun hirak ne’e antes fila hikas ba sira idak-idak nia uma.

Xefi suku Metiaút, Julião da Costa Xavier rekoñese, ohin Ministériu Saúde lori duni sidadaun hirak ne’e no hetan reasaun hosi Komunidade, maibé PNTL no FALINTIL-Forsa Defesa Timor-Leste (F-FDTL)konsege hakalma situasaun iha fatin ne’ebá.

“Fatin Otél Horizonte hanesan fatin kuarentena maibé Ministériu Saúde seidauk fó koñesimentu mai ami kona-ba fatin Horizonte sai fatin Kuarentena,” dehan, Autoridade Lokál ne’e ba Jornalista sira iha Metiaut, domingo (22/03/2020).

Autoridade Lokál ne’e apela ona ba Komunidade atu kontribui hodi implementa desizaun Governu no labele fó sala ba Ministériu Saúde tanba pandemia ne’e kazu global.

“Iha Kuarentena ne’e mak sira moras laiha sira idak-idak ba sira-nia uma hodi hamutuk ho família,” nia esplika tan.

PNTL fó ona seguransa masimu ba fatin Kuarentena ne’ebé estabelesidu iha Otél Novo Horizonte, Metiaút Cristo Rei.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here