PNSIK-AIFAESA halo inspesaun ba loja xinés iha Bairru-Pite. Imajen Tatoli/Maria Auxilidora

DÍLI, 22 marsu 2020 (TATOLI)–Ekipa konjunta husi Autoridade Inspesaun no Fiskalizasaun Atividade Ekonómika no Sanitáriu (AIFAESA) hamutuk ho Polísia Nasionál Investigasaun Kriminal Nasional (PNSIK) ho Polísia Nasionál Timor-Leste (PNTL) Eskuadra Na’in-Feto detein komersiante Xinés balun tanba fa’an máskara la tuir nia folin normal (karun-red).

Negosiante sira ne’e halo atividade negósiu iha Audian, Bairru-Pité no Merkadu Lama ne’ebé fa’an máskara hena ne’ebé iha situasaun normál, faan ho folin sentavu 0,50 sa’e ba dólar ida no balun to’o $2.50.

Ekipa task force foti medida hodi lori komersiante Xinés ba tuir  prosesu investigasaun.

Tuir observasaun iha terrenu, populasaun tama no sai husi loja xinés sira-nian hodi sosa máskara ne’ebé maka fa’an la razoavel nune’e kontaktu direta ba parte kompetente.

Diretór Operasaun AIFAESA, Gabriel da Costa hateten, iha operadór ekonómiku estranjeiru na’in-hitu mak komete infrasaun.

“Ita-nia Polísia Eskuadra Na’in-Feto mak detein duni sidadaun xinés na’in-rua tanba fa’an máskara ho folin ne’ebé aas nune’e kontaktu AIFAESA no ami ho PNSIK direta bá ne’ebá. Iha Bairru-Pité, komandante husi COE nian hatene katak iha ne’ebá fa’an máskara ho folin ne’ebé sa’e. Ita ba direta ne’ebá no hetan sasán sira ne’e folin sa’e duni husi folin sentavu 0,50 ba dólar 2.50. Tanba ne’e sira komete krime no agora kedan submete ba PNSIK no prosesa ba Ministériu Públiku,” dehan diretór ne’e iha Merkadu Lama, ohin.

Gabriel da Costa hatutan, iha parte Audian identifika loja rua mak komete infrasaun no Bairru-Pite iha loja haat no Merkadu Lama iha loja ida.

Estudante Universidade Dili (UNDIL), António M. Freitas, fó sasin dehan nia kontaktu AIFAESA tanba nota katak xinés fa’an máskara sentavu 0.50 sa’e ba dólar ida.

“Ne’e mak ha’u kontaktu ba diretór AIFAESA no sira dehan hein ami. Ha’u atu bá foho no hola máskara folin sa’e entaun la konsege sosa hodi dehan ba komunidade balun ne’ebé hola tiha ona katak imi hein ha’u hodi kontaktu AIFAESA hodi rezolve problema ne’e,” nia afirma.

Negosiante xinés ne’ebé ohin detein ne’e daudaun iha hela Komandu Jerál PNTL, Caicoli, Dili.

Notísia Relevante: MKAE-SEKOMS Tun Direta Hodi Haree Situasaun iha Supermerkadu Sira

Jornalista : Maria Auxiliadora

Editór     : Cancio Ximenes

HAKEREK NO HATÁN

Please enter your comment!
Please enter your name here