Inundasaun nebe akontese iha Bekusi.Imajen/Antonio Goncalves

DILI, 20 marsu 2020 (TATOLI)–Sekretáriu Estadu Protesaun Sivil, Alexandrino Xavier de Araújo hateten, totál afetadu ba inundasaun iha Dili hamutuk xefe família 4286.

“Hosi totál afetadu ba inundasaun iha Dili hamutuk xefe família 4286 ne’e, agora ita foin mak distribuí ba xefe família 1441. Tanba ne’e mak, ohin, ita-nia ekipa kontinua fahe iha fatin seluk ne’ebé afeta mós ba inundasaun,” dehan Sekretáriu Estadu Protesaun Sivil, Alexandrinho Xavier de Araújo, ba jornalista sira iha Sede Suku Lahane Osidentál, Dili, ohin.

Sekretáriu Estadu ne’e haforsa tan katak hosi dadus hirak ne’e sei provizóriu hela no ekipa protesaun sivil mós sei kontinua foti dadus iha terrenu.

Entretantu, Ministra Solidariedade Sosiál no Inkluzaun (MSSI), Armanda Berta dos Santos hateten, Ministériu Solidaridade Sosiál no (Inkluzaun MSSI) hamutuk ho Sekretáriu Estadu Protesaun Sivil (SEPS), ohin, fó apoiu emerjénsia ba vítima lalubur hamutuk uma-kain 71 iha Suku Lahane Osidentál, Postu Administrativu Na’in Feto, Munisípiu Dili.

“Ohin, ita mai iha ne’e atu fó apoiu umanitária ba ita-nia komunidade efetadu sira hamutuk uma-kain 71,” Ministra Solidariedade Sosiál no Inkluzaun (MSSI), Armanda Berta dos Santos, hateten.

Ministra Armanda akresenta, Governu esforsu nafatin hodi kontinua fahe apoiu umanitária ba vítima lalubur sira ne’ebé mak seidauk hetan.

“Governu nafatin esforsu hodi fahe apoiu umanitária ba ita-nia komunidade afetadu sira ne’ebé mak seidauk hetan to’o agora,” nia relata.

Sasán sira ne’ebé fó apoiu vitima afetada sira iha Lahane Osidental ne’e mak hanesan fós, supermie, aqua, biti, lona no seluk tan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here