Fronteira terrestre Batugade. Imajen TATOLI/António Gonçalves

BATUGADE, 21 marsu 2020 (TATOLI)- Antesipa  pandemia Coronavirus (COVID-19) mai Timor-Leste, autoridade-sira ne’ebé iha kompeténsia ba servisu integradu iha liña fronteira entre Timor-Leste ho Repúblika Indonézia, deside taka provizória postu integradu fronteira terrestre hahú kinta (19/03/2020).

Notísia Relevante : Governu Prepara Ona Fatin Tolu atu Antesipa Coronavirus

Timoroan sei bele admite tama liuhosi Postu Fronteira Terrestre Batugade, maibé tenke liuhosi pasa revista hosi ekipa MS ne’ebé kolokadu iha Postu Fronteira Batugade. Imajen/Eugénio Pereira

Tuir observasaun Ajénsia Tatoli nian iha postu integradu fronteira terrestre Batugade, sesta (20/03/2020), haree katak, movimentu sidadaun estranjeiru hosi Indonézia mai Timor-Leste liuhosi fronteira Batugade la-admite ona tama mai area Timor-Leste nian. Enkuantu ba timoroan sei-bele autoriza, maibé tenke liuhosi pasa revista makaas hosi ekipa Ministériu Saúde, Servisu Migrasaun no ekipa Kuarentena Ministériu Agrikultura no Peska (MAP).

Situasaun hanesan, aplika mós ba sidadaun Indonézia no estranjeiru ne’ebé rezidente iha Timor-Leste bele hala’o viajen-sai ba Indonézia, enkuantu ba Timoroan labele tama Indonézia hodi evita mós pandemia COVID-19.

Adjuntu Xefe Postu Servisu Migrasaun Batugade, Sarjentu Xefe Moises Barros hateten, movimentu fronteira taka provizóriu bazeia ba rezolusaun Governu ne’ebé aprova ona iha Konsellu Ministru.

Pasa revista iha Postu Fronteira Batugade hodi evita COVID-19. Imajen/Eugénio Pereira

“Ami ezekuta desizaun governu nian katak, bandu de’it ema sidadaun estranjeiru maka labele tama, maibé ba Timoroan bele tama, maibé tenke hetan pasa revista makaas hosi ekipa saúde para evita pandemia COVID-19,” informa Sarjentu Xefe Moises Barros ba jornalista sira iha Postu Batugade.

Situasaun hanesan mós aplika iha Postu Integradu Oe-Cusse  no Covalima hodi taka provizória movimentu tama-sai Timor-Leste hodi hein desizaun foun hosi Governu.

Tuir dadus ne’ebé fó sai hosi Servisu Migrasaun Batugade katak, durante kinta (19/03/2020),  sidadaun estranjeiru ne’ebé halo movimentu sai ba Indonézia liu fronteira Batugade rejista na’in 161; kompostu hosi feto na’in 56 mane 105. Nune’e mós ba Timoroan ne’ebé movimentu tama hosi fronteira Motain, Indonézia, liu-ba Postu Batugade rejista hamutuk na’in 137 (feto 51 no mane 86).

Sidadaun sira ne’ebé viajen sai hosi Timor-Leste ba Indonézia maioria sidadaun Indonézia, nune’e mós ba movimentu tama mai Timor-Leste maioria estudante Timoroan sira ne’ebé halo estudu iha Kupang, Surabaya, Jakarta, Malang no Bandung-Indonézia.

Servisu Migrasaun nota katak, movimentu ema tama no sai durante taka fronteira kompara ho loron baibain movimentu tama-sai ho volume boot liu too ema na’in 500.

“Movimentu tama-sai agora menus-liu, se ita kompara ho loron baibain makaas-liu, maibé tanba ohin Migrasaun Indonézia mós taka ona sira-nia fronteira entaun ema tama mós menus tebes,”  nia hateten.

Funsionáriu Servisu Migrasaun, Alfándega ka Autoridade Aduaneira (AA) inklui Servisu Seguransa Sivíl ho ekipa Kuarentena Ministériu Agrikultura no Peska, hala’o servisu uza sira-nia osan rasik hodi sosa máskara hodi halo pasa revista ba movimentu Timoroan  ho sidadaun estranjeiru-sira ne’ebé tama no sai iha Postu Batugade.

Mezmu fronteira taka hodi bandu ema tama-sai, maibé movimentu sasán esportasaun nesesidade báziku no sasán infraestrutura nian kontinua tama normál no halo tranzasaun iha área zona livre internasionál entre TL-RI.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here