Vise MInistra Kuidadu Saude Primaira, Elia dos Reis Amaral

DILI, 21 marsu 2020 (TATOLI)-Vise Ministra Kuidadu Saúde Primária, Élia dos Reis Amaral, deklara,Timor-Leste foin deteta kazu COVID-19 pozitivu hosi sidadaun estranjeiru na’in ida, maibé sei la fó risku boot ba públiku tanba hetan ona asisténsia saúde hosi ekipa médiku, no pasiente ne’e izola ona iha fatin adekuadu saúde nian ida iha Dili.

Pasiente ne’e sidadaun estranjeiru no la’ós Timoroan hafoin Ministériu Saúde (MS), iha sabadu lokoraik (21/03/2020) foin klarifika dadus kona-ba indentidade pasiente ne’e.

Maibé Governante ne’e la esplika detaillu kona-ba fatin izolamentu maka dadauk ne’e izola pasiente ne’e.

Governu daudaun ne’e prepara ona fatin Kuarentena maka iha Tibar, Postu Administrativu Bazartete, Munisípiu Liquiça, Sentru Saúde Formosa hanesan fatin internamentu COVID-19 no Sentru Saúde Vera Cruz nu’udar fatin izolamentu.

Departementu Vijilánsia Epidemiolojia dadaun ne’e analiza kedas kazu ne’e ho ninia risku iha ka lae? ba públiku no família ne’ebé maka atu kontaktu ho pasiente ne’e hodi evita da’et tan ba ema seluk.

“No ema ne’e agora daudaun izola iha fatin adekuadu iha saúde nian no Departamentu Visilánsia sei monitór ema ne’e loron- loron,”katak Vise MInistra Saúde iha konferénsia imprensa, iha Caicoli, sabadu (21/03/2020).

Ospitál Darwin Aústralia forñese dadus ne’e hafoin halo teste  ba sampel ne’ebé  maka MS ho Organizasaun Mundiál Saúde haruka ba halo teste foinlalais.

Pasiente ne’e deklara antes ne’e halo viajén ba Rai-liur no foin fila mai Timor-Leste foinlalais.

Entretantu, tuir fontes konfirmadu ida hosi Ministériu Saúde ba TATOLI, reforsa katak maski pasiente ne’e hetan ona positivu COVID-19 maibé iha kondisaun saúde di’ak uituan no la grave.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here