Primeiru-Ministru, Taur Matan Ruak, Prezide Reuniaun Konsellu Ministru Iha Palásiu Governu, Kuarta (18/03). Imajen/Egas Cristovão

DILI, 21 marsu 2020 (TATOLI) – Governu sei submete Proposta Estadu Emerjénsia nian ba Prezidente Repúblika, Francisco Guterres ‘Lú Olo’, iha segunda semana oin, ne’ebé Konsellu Ministru aprova ona iha loron segunda, 16 marsu 2020 relasiona ho COVID-19.

Hafoin Xefe Estadu simu pedidu Governu nian ne’e, maka sei konvoka reuniaun Konsellu Estadu hodi rona opiniaun sira molok lori ba Parlamentu Nasionál hodi hetan aseitasaun no Dekreta Estadu Emerjénsia.

Objetivu Estadu Emerjénsia ne’e atu fó kbiit ba Governu hodi bele halo limitasaun ba sirkulasaun no reuniaun sidadaun sira-nian ne’ebé konsagra iha Konstituisaun Repúblika Demokrátika Timor-Leste (KRDTL), nu’udar parte ida atu halo prevensaun ba transmisaun COVID-19.

Notísia Relevante: KM Solisita PR Lú Olo Dekreta Estadu Emerjénsia Relasiona ho COVID-19

“Daudaun ne’e Governu labele limite sidadaun sira nia movimentasaun no reuniaun sira ne’ebé halibur ema-barak no bele provoka da’et COVID-19 enkuantu seidauk iha Estadu Emerjénsia, maibé bainhira Xefe Estadu Dekreta ona Estadu Emerjénsia mak Governu sei iha kbiit tomak atu hola desizaun lalais ba prevensaun COVID-19 ne’ebe sei perturba sidadaun sira nia direitu balun”, refere nota husi Gabinete Primeiru-Ministru, ne’ebé Agência TATOLI asesu, sábadu ne’e.

Entretantu, país lubuk ida mak Dekreta ona Estadu Emerjénsia, nu’udar meiu ida atu responde lalais ba prevensaun COVID-19 ne’ebé daudaun ne’e sai ona pandemia globál.

Jornalista: Florencio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here