Primeiru-Ministru, Taur Matan Ruak. Imajen/ Egas Cristovao

DILI, 21 marsu 2020 (TATOLI) – Hafoin liu fulan balun, Primeiru-Ministru (PM) Taur Matan Ruak, aprezenta ba Konsellu Ministru hodi aprova proposta rezolusaun Governu ba reativa  arte-marsiál, ohin, iha salaun Otél Luz Clarita,  Taur Matan Ruak, halo enkontru “amizade” ho grupu arte-marsiál hosi IKS.TL (Ikatan Keluarga Silat  Timor-Leste) Kera Sakti.

Notísia Relevante : KM Aprova Rezolusaun Reativa Arte-Marsiál

Sorumutuk “amizade” ne’e, akompaña mós hosi Sekretáriu Estadu Juventude no Desportu (SEJD), Nelio Isaac Sarmento, Sekretáriu Estadu Formasaun Profisionál no Empregu (SEFOPE), Julião da Silva no responsavel másimu IKS.TL Kera Sakti, Silvestre Xavier Sufa.

Membru IKS.TL Kera Sakti besik ema atus hola parte iha sorumutuk ne’e, inklui sira-nia reprezentante hosi munisípiu 12 no Rejiaun Administrativu Espesiál Oe-Cusse Ambeno (RAEOA).

Iha nia intervensaun, Primeiru-Ministru (PM) Taur Matan Ruak, husu ba grupu arte-marsiál hotu atu hametin pás no estabilidade iha rai-laran.

“Atu haforsa ita-nia rain sai buras, ida mak estabilidade tenke iha, dezenvolvimentu tenke iha, ita-nia moris tenke di’ak, nune’e nasaun bele forte,” afirma PM Taur  Matan Ruak.

Xefe governu  mós agradese ba IKS.TL Kera Sakti tanba  bele konvida partisipa iha konferénsia ne’e, atu bele fó opiniaun hodi kontribui ba konsolidasaun dezenvolvimentu organizasaun ne’e nian tuir baze legais ne’ebé nasaun define iha area juventude no desportu.

Primeiru-Ministru Taur Matan Ruak, hateten, dezde uluk to’o ohin loron, grupu arte-marsiál enfrenta difikuldade oioin, tanba ne’e, estadu kontinua buka oinsá bele tenta integra joven-sira no organizasaun hotu-hotu iha prosesu dezenvolvimentu nasaun.

PM Taur mós preokupa kona-ba, arte-marsiál balun ba sa’e sintu (pengesahan) iha nasaun seluk hodi halo juramentu tuir rai seluk nia identidade, tanba ne’e, Taur Matan Ruak, afirma tan, Timoroan presiza hametin nia identidade-rasik.

“Dalaruma ita halo ita nia uma iha tempu bapa (Indonézia nian) no dalaruma ita hatais ne’e mós iha tempu Indonézia nian. Ema dehan, ita tuir malae-sira ou lae, maibé kada nasaun ida ita ba iha ninia diferensa identidade,” Taur Matan Ruak hateten.

Nia afirma tan, atu hametin Timoroan-nia identidade rasik importante tebes ne’ebé iha funsaun rua; ida hametin Timoroan-nia unidade no ida seluk, distinge Timoroan hosi kestaun polítika, nune’e oinsá kontribui ba estabilidade nasaun no kria fatin ida di’ak ba ema atu servisu.

“Ita jerasaun ba jerasaun ne’e troka malu no jerasaun ne’e nian tenke kontribui ba dezenvolvimentu,” afirma Taur Matan Ruak.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here