Movimentasaun loja ida iha Dili-laran hafoin Ministériu Saúde fó sai informasaun kona-ba COVID-19. Imajen Tatoli/Florencio Miranda Ximenes

DILI, 21 marsu 2020 (TATOLI) – Hafoin Ministériu Saúde (MS) anunsia katak deteta kazu dahuluk ema na’in-ida pozitivu COVID-19 iha Timor-Leste, movimentasaun komunidade iha loja sira hahú sa’e maka’as hodi sosa nesesidade báziku.

Kompradór iha Supermerkadu, Leandro Lopes, hateten hafoin rona informasaun ofisiál husi MS, komunidade sira hahú sosa fós no sasán seluk tan hodi asegura iha uma-laran.

“Ami sente tauk hodi mai sosa sasán iha loja sira tanba dehan deteta ona Coronavírus iha Timor-Leste”, tenik Leandro ba Agência Tatoli, sábadu ne’e.

Iha sorin seluk, kompradora Maria da Costa, dehan hafoin rona informasaun, nia parte ba sosa kedan ai-han tanba tauk loja atu taka.

“Ami mai sosa fós, labarik sira nia susu-been no sasán uma-laran seluk tanba tauk keta loja sira taka hotu”, nia dehan.

Entretantu, Loja Na’in Lita Store, Foo Hu Kiun, garante ba públiku loja sei lá taka, maibé presiza apoia husi Governu hodi kontinua fa’an nesesidade báziku ba komunidade sira.

“Ohin meudia kliente sira hahú mai barak hola sasán tanba dehan pániku, maibé ami sei kontinua loke no la taka. Komunidade mai barak tanba tauk loja taka”, nia akresenta.

Loja Na’in ne’e garante stock ai-han sei sufisiente atu nesesita ba komunidade sira.

Jornalista: Florencio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here