Ministru Koordenadór Asuntu Ekonómiku (MKAE) no Ministru Turizmu, Komérsiu no Indústria (MTKI) interinu, Fidelis Manuel Leite Magalhães no Sekretáriu Estadu Komunikasaun Sosiál (SEKOMS), Merício Juvenal dos Reis “Akara”, tun direta hodi haree situasaun iha supermerkadu sira. Imajen/Florencio M. Ximenes.

DILI, 21 marsu 2020 (TATOLI) – Ministru Koordenadór Asuntu Ekonómiku (MKAE) no Ministru Turizmu, Komérsiu no Indústria (MTKI) interinu, Fidelis Manuel Leite Magalhães no Sekretáriu Estadu Komunikasaun Sosiál (SEKOMS), Merício Juvenal dos Reis “Akara”, tun direta hodi haree situasaun iha supermerkadu sira hodi konfirma stock sasán.

“Ha’u rasik simu informasaun dehan sasán laiha ona. Satán meiudia depois anúnsiu fó sai dehan ema ida maka teste pozitivu, loja sira ne’e ema ataka hotu ona. Maibé, ha’u rasik haree katak la’ós hanesan ne’e, stock sasán sira sei sufisiente,” Ministru Fidelis Magalhães dehan bainhira observa direta sasán sira iha supermerkadu Lita Store, iha Lecidere, sábadu lorokraik ne’e.

Governante ne’e afirma, kuandu ba loja ka supermerkadu sira iha Dili laran ne’e, kliente sira sosa sasán hanesan iha loron boot Natál nian tanba de’it rona katak iha Timor-Leste deteta ona kazu COVID-19.

“Ohin, iha Leader mós haree katak ema barak duni, maibé loja sira aguenta. Sira garante katak armazen sei nakonu hela no sira mós sei asegura atu kontentór sira seluk sei mai ho sasán sufisiente ba ita-nia nesesidade,” ministru ne’e afirma.

Fidélis Magalhães hateten, nia parte tun direta para iha hanoin rasik no iha situasaun ida agora ne’e espesiál hodi haree para fó mensajen ba públiku katak Governu tau-matan hela evolusaun ba situasaun ida ne’e.

“Ha’u la’ós tun atu hadau fali AIFAESA nia serbisu. Tun ho Sekretáriu Estadu para bele hatene situasaun ne’e rasik. Para ita iha informasaun direta tanba iha krize ida hanesan ne’e lato’o hein de’it input husi okos. Dalaruma husi tempu ba tempu tun hodi haree rasik para iha buat ruma urjente karik ita komprende input saida mak sira fó ne’e ita iha hanoin rasik katak ne’e grave oinsá ka di’ak hela ne’e, di’ak oinsá,” nia dehan.

Atuál Ministru Reforma Lejizlativa no Asuntu Parlamentár (MRLAP) ne’e orienta mós ba Banku Nasionál Komérsiu Timor-Leste (BNCTL, sigla portugés) atu halo esforsu boot ida hodi haree lalais ba prosesu pagamentu saláriu nian.

“Inklui atu asegura katak stock osan iha mákina ATM sira ne’e sufisiente. Ne’ebé sira (BNCTL) halo esforsu lubun boot ida. Ba komunidade sira, dalaruma ita-boot sira bá maka osan seidauk iha karik, pasiénsia uitoan, imi bele filafali bá no ekipa BNCTL nian servisu oras 24 para asegura katak ATM sira ne’e iha osan sufisiente para imi bele dada. Se mákina ruma mak aat ka osan sei mamuk tanba ema barak bá foti ne’e pasiénsia uitoan,” nia dehan.

Jornalista : Maria Auxiliadora

Editór       : Cancio Ximenes

HAKEREK NO HATÁN

Please enter your comment!
Please enter your name here