SEJD Nelio Isaac Sarmento (faru mutin), PM Taur Matan Ruak, SEFOPE Julião da Silva ho responsavél masimu IKS.TL Kera Sakti, Silvestre Sufa, halo sorumutuk ho membru IKS.TL Kera Sakti iha salaun otél Luz Clarita, Dili, sabádu (21/03/2020). Imajen/Nelson de Sousa

DILI, 21 marsu 2020 (TATOLI) – Organizasaun arte-Marsiál IKS.TL (Ikatan Keluarga Silat Timor-Leste) Kera Sakti, ohin, halibur-malu iha salaun otél Luz Clarita, Dili, hodi kontribui ideia ba malu, oinsá organiza-malu hodi kumpre rekizitu Lei No.5/2017 no lori ba rejistu iha Komisaun Reguladóra Arte-Marsiál (KRAM).

Notísia Relevante : PM Taur Halo Enkontru “Amizade” ho IKS-Kera Sakti

Logotipu IKS-Kera Sakti

Governu liuhosi reuniaun Konsellu Ministru (KM), foin lalais ne’e, aprova ona Proposta Rezolusaun Governu ne’ebé aprezenta hosi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013, 10 jullu, ne’ebé bandu Grupu Arte-Marsiál (GAM) hala’o atividade.

Sorumutuk ne’ebé halibur reprezentante membru IKS.TL Kera Sakti hosi munisípiu 12 ho Rejiaun Administrativu Espesiál Oe-Cusse Ambeno (RAEOA) ne’e lidera hosi responsavel másimu IKS.TL Kera Sakti, Silvestre Xavier Sufa no marka mós prezensa hosi Primeiru-Ministru (PM), Taur Matan Ruak, Sekretáriu Estadu Juventude no Desportu (SEJD), Nelio Isaac Sarmento, Sekretáriu Estadu Formasaun Profisionál no Empregu (SEFOPE),   Julião da Silva, no konvidadu sira-seluk tan.

Notísia Relevante : KM Aprova Rezolusaun Reativa Arte-Marsiál

Silvestre Xavier Sufa hateten, objetivu hosi sorumutuk ka konferénsia ne’e atu diskute organizasaun ne’e nia estatutu no estrutura hodi kumpre rekizitu tuir lei 5/2017 no rekizitu hosi KRAM atu bele hetan legalidade.

Nia hateten, desizaun governu nian hodi halo revogasaun lei númeru 16/2013, hodi nune’e, fó biban ba arte-marsiál IKS.TL Kera Sakti hodi ezerse fali nia funsaun hanesan organizasaun desportiva.

Silvestre dehan, maske rezolusaun Governu nian reativa ona atividade GAM, maibé seidauk bele fó treinu ka hala’o atividade arte-marsiál tanba tenke kumpre rekizitu balun iha Lei no regulamentu KRAM nian.

Biban ne’e, SEJD Nelio Isaac Sarmento, esklarese katak, hafoin Governu deside reativa atividade arte-marsiál, hanesan IKS.TL Kera Sakti, Persaudaraan Setia Hati Terate (PSHT) ho Kmanek Oan Rai Klaran (KORK), maka SEJD hetan pedidu atu ajuda GAM-sira oinsá mak atu haree sira-nia estatutu legais.

Nia dehan, atu hala’o fali atividade GAM nian maka tenke kumpre Dekretu Governu Nu.5/2017 no regulamentu-sira ne’ebé aprova no prodús  hosi KRAM.

Daudaun ne’e SEJD define hela prosesu mekanizmu rejistrasaun, hahú uluk hosi oinsá atu hetan autorizasaun to’o organizasaun arte-marsiál-sira hetan pedidu ofisial hosi SEJD no lori ba halo rejistrasaun iha servisu notariadu para bele hetan legalidade.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here