DILI, 21 marsu 2020 (TATOLI)—Primeiru-Ministru (PM), Taur Matan Ruak, sei foti medida rápida no urjente ba COVID-19 tanba iha Timor-Leste deteta ona kazu refere.

“Primeira vez ita deteta infetada Coronavirus iha ita-nia rain. Situasaun rua ne’e ejize ita tomak foti medida rápida no urjente. Ida ne’e akontese Parlamentu Nasionál asume fila-fali ninia responsabilidade no fó apoiu ba governasaun ne’ebé de’it, satán iha momentu Orsamentu Jerál Estadu la iha,” Primeiru-Ministru, Taur Matan Ruak, nu’udar mós Prezidente Partidu Libertasaun Populár (PLP), dehan asuntu ne’e bainhira hala’o deklarasaun konjunta ida ho Sekretáriu Jerál FRETILIN, Marí Alkatiri, iha Hotel Timor, sábadu ne’e.

Xefe Estadu ne’e fó-sai katak, oras ne’e Governu iha téknika interministeriál ida hodi responde ba Coronavirus ne’e.

“Hosi serbisu ida-ne’e mak ida deteta ema ne’ebé moras, naturalmente serbisu la para iha ne’e de’it. Se ita haree esperiénsia nasaun seluk nian lori fulan haat ka lima, ita naturalmente preparadu hodi enfrenta situasaun ida-ne’e,” Xefe Governu ne’e hateten.

Xefe Governu ne’e afirma, karik Governu foun ne’ebé mai sei la halo buat foun maibé hadi’a, hatutan no baburas liután buat ne’ebé mak VIII Governu halo daudaun ona.

Primeiru-Ministru VIII Governu Konstitusionál ne’e hateten, kona-ba pedidu estadu emerjénsia hodi limita sidadaun sira-nia movimentu, segunda-feira aban sei haruka ba Prezidente Repúblika, Franscisco Guterres ‘Lú Olo’ hodi hakbiit an responde ba situasaun emerjénsia.

Entretantu, iha loron sesta (21/3/2020) horisehik, Prezidente Repúblika (PR), Francisco Guterres ‘Lú Olo’ fó-sai katak, bainhira simu pedidu emerjénsia hosi Governu sei tau prioridade.

“Kona-ba Dekretu Prezidensiál ba Estadu Emerjénsia, Prezidente Repúblika seidauk simu proposta hosi Governu atu foti medida ida ne’e. Bainhira simu proposta ne’e, mak ha’u sei hala’o kedas prosesu hodi rona Konsellu Estadu no Konsellu Defeza no Seguransa Nasionál nia opiniaun no submete ba Parlamentu Nasionál nia autorizasaun,” dehan Xefe Estadu.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here