Sekretáriu Jerál partidu FRETILIN, Marí Alkatir. Imajen Tatoli/António Goncalves

DILI, 21 marsu 2020 (TATOLI)—Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri hateten, sei asegura nafatin Primeiru-Ministru (PM), Taur Matan Ruak, to’o 2023 maibé prontu simu desizaun bainhira Prezidente Repúblika (PR), Francisco Guterres ‘Lú Olo’ pronunsia.

“Ha’u la dehan FRETILIN mak atu lidera Governu. Ha’u dehan FRETILIN sei apoia nafatin Primeiru-Ministru, Taur Matan Ruak, iha VIII Governu Konstitusionál to’o 2023. Tanba, FRETILIN nia estratéjia serbisu nafatin atu manan eleisaun iha 2023. Maibé tempu agora susar ne’e, FRETILIN hanoin katak estabilidade governativa ita tenke garante, la’ós muda Governu mak iha estabilidade governativa. Fó apoia ba sé mak ukun agora, ne’e atu lori kultura polítika foun mai ita-nia rain,” dehan Mari Alkatiri, iha ámbitu asinatura akordu konjuntu entre PLP no FRETILIN, iha Hotel Timor, sábadu ne’e.

Marí Alkatiri afirma, la’os hatún Governu tanba hakarak podér maibé tenke ajuda Governu halo serbí di’ak liu povu ida-ne’e, ne’e mak FRETILIN hakarak. FRETILIN preokupa ho vida povu nian tanba ne’e sei apoia tomak ba Primeiru-Ministru, Taur Matan Ruak atu kontinua.

“Aban bainrua se prezidente deside atu kria IX Governu preparadu nafatin hanesan parseiru FRETILIN, PLP ho seluk tán atu kontinua to’o 2023, laiha Eleisaun Antesipada,” Alkatiri hateten.

Ho kompozisaun polítika iha Parlamentu Nasionál, nia hatutan, FRETILIN fiar plataforma ida-ne’e sei la’o bá-oin

“Tanba iha Parlamentu Nasional partidu boot no kiik iha interese la hanesan, partidu kiik lakohi Eleisaun Antesipada, partidu boot balu hakarak Eleisaun Antesipada. Ne’e de’it la hanesan ona. Semana oin FRETILIN no PLP sei aprezenta plataforma ne’e ba Prezidente Repúblika, Francisco Guterres ‘Lú Olo’,” nia dehan.

Sekretáriu Jerál FRETILIN ne’e la preokupa Governu minória no maioria tanba esperiénsia hatudu ona maioria no minória mós monu, entaun tenke buka solsaun ida inkluzivu la’ós hanesan grande inkluzaun ne’ebé ema barak ko’alia ne’e.

Eis Primeiru-Ministru ne’e afirma, ho situasaun oras ne’e atravesa ho COVID-19 laiha dalan ba Eleisaun Antesipada no lalika halimar ho eleisaun.

“Governu minoritária la sustentável, laiha sustentabilidade governativa. Mai Governu maioritária mós laiha sustentabilidade governativa. Signifika, ita presiza hanoin didi’ak bainhira ita halo Governu ida atu esklui seluk iha sorin sei la sustentável nafatin,” nia dehan.

Mari Alkatiri esplika, bainhira halo Governu ida ho prinsípiu atu inklui hotu-hotu, entaun ne’e mak bele iha sustentabilidade.

“Tanba ne’e ha’u fiar biar ami PLP no FRETILIN hahú de’it kadeira 31 maibé ha’u fiar katak aban bainrua forma duni IX Governu, programa no orsamentu sei liu tanba partidu sira iha parlamentu mós kole ona ho impase polítika. Povu tomak kole liután. Sé mak ukun tenke rezolve uluk povu nia vida,” nia hateten.

Sekretáriu Jerál FRETILIN ne’e argumenta, entendimentu entre FRETILIN no PLP ne’e la’ós kontra natura, entendimentu ida-ne’e laiha kontradisaun interese maibé iha interese komún atu serbí povu.

Entretantu, Prezidente Partidu Libertasaun Populár (PLP), Taur Matan Ruak, preokupa liu situasaun emerjénsia sira iha rai-laran tanba tenke fó resposta ho solusaun.

“Governu haruka buat rua, ida kona-ba proposta alterasaun ba Lei Orsamentu no Jestaun Finanseira no ida husu levantamentu osan. Ha’u fiar katak solusaun sei iha no ha’u fiar sei pasa iha Parlamentu Nasionál,” dehan Prezidente PLP no atuál Primeiru-Ministru VIII Governu Konstitusionál.

Maske nune’e, Prezidente PLP ne’e afirma, sustentabilidade governativa importante iha governasaun ida nune’e bele fó solusaun ba kualkér problema iha rai-laran.

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. F Vota kontra OGE 2020 hodi kontribui XUMNA TIHA OGE REFERE, depois agora atu viabiliza fali governassun to 2023, laiha resusinio logico.

HAKEREK NO HATÁN

Please enter your comment!
Please enter your name here