Eis Primeiru Ministru no atual Sekretariu Jeral Partidu Fretilin, Mari Alkatiri wainhira hasoru malu ho Primeiru Ministru Taur Matan Ruak iha Palacio Governu.Imajen/Media GPM

DILI, 21 marsu 2020 (TATOLI)—Partidu Frente Revolusionária Timor-Leste Independente (FRETILIN) no Partidu Libertasaun Populár (PLP) hala’o deklarasaun konjunta kompromete atu loke dalan ba IX Governu Konstitusionál no kontribui ba Timor-Leste bele sai hosi impase polítiku.

“Ohin PLP ho FRETILIN hamutuk atu loke-an atu-bele kontribui harii nasaun ida foun, nasaun ida unida, atu bele sai hosi impase polítiku ida-ne’em maibé ne’e de’it la to’o. Jenerál Taur Matan Ruak ho ha’u rasik ami sei asina deklarasaun ida la’ós atu halo aliansa foun, atu define plataforma entendimentu ida atu loke-an halibur ema hotu-hotu iha rai ida-ne’e, aluta mós kontra Coronavirus no hamutuk atu manan impase polítika ida-ne’e,” Sekretáriu Jerál FRETILIN, Marí Alkatiri, afirma liuhosi deklarasaun konjunta ho Prezidente Partidu Libertasaun Populár (PLP), Taur Matan Ruak, iha Hotel Timor, sábadu ne’e.

Alkatiri haktuir, partidu rua ne’e hamutuk mós atu hahú luta no atu manán Coronavirus tanba ne’e autoridade fó-sai timoroan hotu tenke halo tuir oinsá atu salva uluk povu ida-ne’e hafoin haree fila fali situasaun sira seluk.

Entretantu, Prezidente Partidu Libertasaun Populár (PLP), Taur Matan Ruak hateten, PLP prontu serbisu hamutuk ho FRETILIN hodi fó solusaun ba problema sira iha rai-laran.

“PLP prontu serbisu hamutuk ho FRETILIN hodi loke dalan, loke opurtunidade hodi ajuda buka solusaun saida de’it mak Prezidente-Repúblika deside. PLP prontu para fó ninia kontribuisaun, satán ita-nia nasaun hasoru situasaun rua ke grave. Ida dezastre naturál ne’ebé grave no daudaun ne’e coronavirus. Primeira vez ita deteta infetada Coronavirus iha ita-nia rain. Situasaun rua ne’e ejize ita tomak foti medida rápida no urjente. Ida ne’e akontese Parlamentu Nasionál asume fila-fali ninia responsabilidade no fó apoiu ba governasaun ne’ebé de’it, satán iha momentu Orsamentu Jerál Estadu la iha,” Taur Matan Ruak hateten.

Prezidente PLP ne’e afirma, nasaun labele hein tanba ita-nia tempu oituan de’it, ita labele lakon ita-nia tempu.

Prezidente PLP aproveita tempu ne’e agradese ba Prezidente Partidu CNRT Xanana Gusmão, estrutura no militante CNRT tomak, estrutura tomak hosi partidu KHUNTO, ne’ebé menus tinan-rua fó konfiansa ba nia hodi lidera VIII Governu Konstitusionál.

“Ha’u agradese ba kooperasaun hotu-hotu ne’ebé iha. No ha’u hakarak garante ba Sekretáriu Jerál FRETILIN, Marí Alkatiri katak ha’u-nia partidu prontu koopera ho ita-boot no partidu FRETILIN para buka solusaun ba problema sira-ne’ebé iha hodi hakotu sofrimentu povu nian no haforsa ita-nia an kombate Coronavirus ne’ebé invade mundu tomak, naturalmente Timor-Leste mós sei la sees hosi ida-ne’e,” dehan Taur Matan Ruak.

Deklarasaun konjunta ne’e partisipa hosi kuadru partidu FRETILIN, PLP, kuadru partidu seluk ne’ebé partisipa iha deklarasaun konjunta ne’e mak hosi KHUNTO, kuadru Partidu Demokrátiku (PD), Lourdez Maria Bessa.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here