Ekipa Saúde halo teste ba estudante-sira ne'ebé tama mai Timor-Leste liuhosi Postu Integradu Batugade. Imajen/Eugénio Pereira

BATUGADE, 21 marsu 2020 (TATOLI)-Estudante Timoroan ne’ebé hala’o sira-nia estudu iha universidade-sira iha Indonézia, lubuk ida, sesta (20/03/2020), haku’ur tama mai Timor-Leste liuhosi postu fronteira terrestre Batugade.

Notísia Relevante : TL-RI Taka Provizóriu Postu Integradu Fronteira Terrestre

Molok sai liu-mai area Timor-Leste nian, estudante sira-ne’e submete ba pasa revista intensivu no halo teste hosi ekipa Ministériu Saúde (MS) ne’ebé koloka iha Postu Integradu Batugade, atu evita pandemia Coronavirus (COVID-19) tama Timor-Leste.

Hosi estudante lubun ne’e, iha estudante na’in rua mak husu ba ekipa médiku MS nian atu voluntáriamente hatama sira-na’in rua iha kuarentena hodi kumpre loron 14-liu maka sira-sai ba sira-nia família.

“Ami husu, se-posivel kuarentena  lai ami iha fatin kuarentena to’o loron 14, tanba ami foin fila hosi Surabaya-Indonézia, nu’udar sidade ida ne’ebé mós afetadu ona COVID-19,” hateten estudante Timoroan na’in rua ne’e ba  ekipa Médiku Jerál Ministériu Saúde iha Postu Integradu Batugade.

Mezmu sira-nain rua rejeita atu públika sira-nia identidade, maibé ho boa-fé, sira-na’in rua hakarak tebes atu Ministériu Saúde fasilita sira-na’in rua tama kuarentena atu evita pandemia COVID-19 liuhosi sira-na’in rua bele da’et fali ba família-sira iha Timor-Leste.

Notísia Relevante : Timoroan Ida Deskonfia Kona Coronavirus

“Ami fila mai Timor-Leste tanba ta’uk ho COVID-19. Ami mós lakohi COVID-19 ne’e da’et mai ita nia rain no ita nia família sira iha Timor,”  hateten estudante  na’in rua ne’e ba ekipa saúde.

Tuir observasaun Ajénsia Tatoli, nota katak, ekipa Médiku Jerál Ministériu Saúde haruka de’it estudante rua ne’e uza nafatin máskara hodi fasi liman ho alkóliku, depois kontinua uza Infrared Thermometer hodi teste sira-nia kondisaun fíziku ka temperatura no la deteta sira-na’in rua iha sintoma COVID-19.

Médiku-sira propoin ba sira-na’in atu kontinua viajen mai Dili no karik sente sofre moras ruma bele kontaktu ekipa Médiku Jerál iha Dili hodi fó asisténsia saúde.

Ekipa Médiku Jerál Postu Batugade deklara, katak,  sira labele izola estudante na’in rua, tanba haree ba kondisaun fasilidade saúde iha fronteira la permite (mínimu kondisoens).

“Ami la iha kondisaun atu haruka ita-boot sira hela iha ne’e, maibé se ita-boot sira ba too Dili sente ladún seguru bele kontaktu ekipa Ministériu Saúde atu bele fó asisténsia tanba ami só teste de’it ita-boot sira nia kondisaun,” esplika ekipa médiku ba estudante  na’in  rua ne’e.

Hafoin prenxe Deklarasaun Saúde, estudante na’in rua kontinua hetan pasa revista hosi ekipa Migrasaun hodi tau vistu ba sira-nia pasaporte no kontinua viajen mai Dili.

Iha parte seluk, Adelino Memoriano Freitas nu’udar estudante ne’ebé hala’o estudu Universidade Surabaya deklara katak, nia-parte deside fila, tanba ta’uk ho pandemia COVID-19 ne’ebé makaas no lalais tebes iha territóriu Indonézia.

Nia dehan, nia parte akompaña informasaun hosi Governu Timor-Leste no Indonézia deside atu taka provizóriu fronteira rai rua, tanba ne’e, sira deside fila mai Timor-Leste hodi hein no aproveita trata mós sira-nia dokumentu estudu nian hanesan KITAS.

Iha fatin hanesan, Estudante Timoroan, Rosaria Jesica Guterres dos Santos, ne’ebé hala’o estudu iha Malang-Indonézia dehan, nia ho kolega balun deside fila Timor-Leste tanba ta’uk mós ho pandemia COVID-19.

Rosaria lia tutan, sira rasik husu ona lisensa ba sira-nia dosente no universidade hodi autoriza  sira fila-mai Timor-Leste no too tempu ezame karik, sira bele partisipa ezame liuhosi online.

Ekipa Saúde Presiza Prepara Ambulánsia

Iha parte seluk, Komandante Unidade Polisia Fronteira (UPF), Superintendente Xefe, João Belo, husu ba Ministériu Saúde no Organizasaun Mundiál Saúde (OMS) atu prepara ambulánsia ida inklui fasilidade kompletu iha fronteira.

Komandante João Belo rekoñese katak, ekipa UPF, Migrasaun no Ekipa Médiku iha Postu Batugade, Covalima no Oe-Cusse, laiha fasilidade adekuadu atu próteze-aan bainhira halo servisu kontrola movimentu sidadaun estranjeiru no Timoroan ne’ebé halo movimentu tama-sai fronteira terrestre.

“Problema iha fronteira ne’e risku mós ba ema hotu nia saúde, tanba ita nia estudante na’in rua ne’ebé ohin fila husu atu tama kuarentena atu bele asegura sira-nia aan hosi pandemia COVID-19, maibé ami iha postu integradu kondisaun la iha liu,” Komandante João Belo hateten.

João Belo husu ba ekipa Ministériu Saúde presiza kria kondisaun iha postu integradu hodi reforsa ekipa Médiku Jerál sira karik identifika suspeitu COVID-19 bele fó asisténsia emerjénsia.

Problema ne’e rasik, Komandante UPF ne’e aprezenta ona ba Komisáriu Jerál PNTL, Faustino da Costa, atu aprezenta ba Ministériu Saúde bele identifika uma mamuk ruma iha Batugade bele uza sai fatin kuarentena no izolamentu.

Jornalista : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here