Movimentasaun komunidade iha loja iha Dili-laran hafoin Ministériu Saúde fó sai kazu dahuluk COVID-19 iha Timor-Leste. Imajen Tatoli/António Gonçalves

DILI, 21 marsu 2020 (TATOLI) – Komunidade iha Dili-laran ho inisiativa rasik hahú sosa nesesidade báziku, hodi prepara bainhira Estadu deside labele sai uma relasiona ho kazu COVID-19 ne’ebé foin dahuluk deteta iha Timor-Leste.

Foin lalais ne’e, Governu liuhosi desizaun Konsellu Ministru, solisita Prezidente Repúblika hodi dekreta Estadu Emerjénsia relasiona ho pandemia COVID-19.

Notísia Relevante: KM Solisita PR Lú Olo Dekreta Estadu Emerjénsia Relasiona ho COVID-19

Kompradora Angélica Amaral Quintão relata hafoin rona informasaun ofisiál hosi Ministériu Saúde (MS), maka foti kedas inisiativa hodi ba sosa sasán hodi rai iha uma.

“Ami mai sosa ai-han hodi rai iha uma bainhira Estadu deside labele sai no loja sira taka hotu entaun ho ida-ne’e ami preparadu ona”, Angélica Amaral adianta ba Agência Tatoli hafoin sosa sasán iha Lider Supermerkadu, sábadu ne’e.

Tuir Angélica, molok ne’e seidauk simu informasaun formál husi entidade kompetente, tanba ne’e la’o sai mós la uza máskra no seidauk iha hanoin atu ba sosa sasán ho kuantidade barak, maibé hafoin akompaña informasaun hosi MS maka família foti inisiativa hodi uza hotu máskara no sosa ai-han.

“Durante ne’e iha de’it informasaun maibé ohin fó sai ona katak iha ona ema ida mak pozitivu. Durante ne’e só informasaun de’it ne’ebé ami família la’o sai mós ami la uza máskra, maibé agora iha ona ema na’in-ida mak pozitivu, ne’ebé ami la’o sai uza hotu ona máskra”, nia akresenta.

Sasán ne’ebé maka Angélica sosa mak hanesan tisu, ai-han, no sasán sira seluk ne’ebé presiza.

Enkuantu, Kompradór Hendrique do Rosário, hateten nia parte prefere liu sosa sasán hanesan sabaun, kompara sosa sasán ba konsome tanba sei iha loja kiik sira ne’ebé sei loke.

“Ha’u mai atu sosa sasán maibé ha’u haree ema antri demais, entaun ha’u sei hamrik hodi hein oituan. Ha’u mai atu sosa sabaun sira maibé kona-ba hahán di’ak hela tanba loja kiik sira sei loke”, dehan Hendrique do Rosario.

Nune’e, nia husu ba komunidade liuliu kompradór sira bele sosa sasán maibé tenke kontrola mós orsamentu família nian tanba ho situasaun Coronavírus afeta tebes ba ekonomia mundiál.

“Mundu hotu afeta ba Coronavírus, maibé iha parte ida ita labele pániku demais se lae ita la kontrola orsamentu família. Di’ak liu mak hatoman-an fase liman iha kualkér atividade ruma”, nia salienta.

Tuir observasaun Agência Tatoli iha terrenu, situasaun iha loja sira hanesan Leader Supermerkadu, W-Four, Lita Store no loja seluk,  nakonu ho kompradór.

Iha Lider Supermerkadu no loja sira seluk, nakonu ho motorizada, no hirak ne’ebé atu tama ba loja laran obrigatóriamente tenke fase uluk liman ho sabaun ne’ebé maka prepara hosi funsionáriu loja nian antes tama ba loja laran, nune’e mós antes sai hosi loja tenke fase hikas liman.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here