Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 20 marsu 2020 (TATOLI)-Governu liuhosi Ministériu Negósiu Estranjeiru no Kooperasaun (MNEK), Dionísio Soares Babo, deklara Governu sei fó toleránsia ba sidadaun estranjeiru ne’ebé dadaun ne’e vistu mate atu kontinua hela nafatin iha Timor-Leste perante desizaun governu sai hodi bandu ema hosi rai-li’úr atu tama no sai iha Territóriu durante fulan ida ba prevene COVID-19.

Dionísio Soares Babo hato’o asuntu ne’e hodi responde preokupasaun ne’ebé aprenzenta hosi Embaixadór sira durante enkontru hamutuk iha sesta (20/03/2020), iha edifísiu MNEK Praia dos Coqeiros Dili.

Korpu Diplomátiku sira preokupa asuntu ne’e tanba Governu Indonézia mós taka ona odamatan bae ma estranjeiru atu vízita sira-nia nasaun. Ho nune’e defisil bainhira vistu mate tenke sai hosi Territóriu Timor-Leste hodi renova.

Babo hateten governu konsidera preokupasaun ne’e, tanba ne’e maka MNEK koordena ona servisu ho Servisu Imigrasaun no seluktan hodi fó toleránsia ba sidadaun estranjeiru bainhira identifika vistu mate.

“Ita bele fó toleránsia para estende to’o prazu ne’ebé maka ita sei halo avaliasaun tuir rezolusaun fulan-ida,”dehan, Ministru Dionísio Soares Babo, hafoin halo enkontru ho Korpu Diplomátiku sira iha MNEK, Praia dos Coqeiros Dili, sesta (20/03/2020).

No Governante ne’e mós husu ona ba Embaixadór sira atu informa ba sira-nia sidadaun ida-idak hodi koopera ho pesoál saúde atu fó asisténsia bainhira sofre moras ho sintoma hanesan COVID-19.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here