Sekretáriu Estadu Formasaun Profisionál no Empregu, Julião da Silva. Imajen Tatoli/ Egas Cristovão

DILI, 20 marsu 2020 (TATOLI) – Sekretáriu Estadu Formasaun Profisionál no Empregu, Julião da Silva, informa Sekretaria Estadu Formasaun Profisionál no Empregu (SEPFOPE) seidauk hetan pedidu husi traballadór timoroan husi Austrália no Korea, atu fila mai Timor-Leste.

“To’o agora ami seidauk simu traballadór sira-nian pedidu atu fila, maibé ita-nian Embaixada sirdadaun ne’e kontinua komunika ho traballdór sira iha nasaun rua-ne’e“, nia dehan liuhosi Konferénsia Imprensa ne’ebé maka hala’o iha Salaun SEFOPE, Caicoli, sesta ne’e.

Tuir governante ne’e, daudaun ne’e kondisaun traballadór sira iha Austrália no Korea d’iak hela.

“Kondisaun traballadór timoroan iha nasaun-rua di’ak hela, enkuantu Governu Austrália bandu traballadór sira  la sai arbiru no la autoriza sira atu sai ba fatin ne’ebé de’it tanba relasiona ho COVID-19. Tanba ema-nian nasaun ninia regra maka forte liu”, nia adianta.

Tuir nia, MNEK la’ós de’it halo kontaktu husi nasaun rua-ne’e maibé mantein mós kontaktu ho maluk timoroan sira ne’ebé iha diaspora.

“Ita-nian adidu traballadór kontinua komunika ho sira no ita-nian konsuladu sira kontinua komunika ho sira, kuandu sente afetadu ona ba moras ne’e ita bele halo re-alokasaun ba sira liuhosi kooperasaun Governu, nune’e sira bele lori ba fatin karantina, maibé daudaun ne’e ita-nian ema laiha problema iha diaspora liga ho COVID-19”, nia akresenta.

Nia subliña tan, Governu ninia responsabilidade maka bainhira sira tama mai Timor-Leste, tenke tama karantina durante loron 14 nia laran.

Jornalista: Natalino Costa

Editora: Julia Chatarrina

 

HAKEREK NO HATÁN

Please enter your comment!
Please enter your name here