Sekretáriu Estadu Formasaun Profisionál no Empregu, Julião da Silva. Imajen Tatoli/ Egas Cristovão

DILI, 20 marsu 2020 (TATOLI) – Sekretaria Estadu Formasaun Profisionál no Empregu (SEPFOPE) rejeita informasaun ne’ebé espalla iha rede sosiál ne’ebé dehan katak iha traballadór timoroan ida husi Korea ne’ebé mak tama Timor-Leste tuir dalan ilegál.

Tuir Sekretáriu Estadu Formasaun Profisionál no Empregu, Julião da Silva, joven traballadór ne’e daudaun iha hela Korea no seidauk iha hanoin mai Timór relasiona ho sirkulasaun COVID-19.

“Iha kazu horseik mosu iha Facebook ne’e, hato’o katak joven ida hanesan traballdór husi Korea tama mai iha Timor-Leste liu dalan illegál. Atu informa de’it katak informasaun ne’e laloos no timoroan ne’e agora iha Korea no hala’o hela ninia atividade servisu hanesan bain-bain no normál. Nune’e mós dook husi sidade ne’ebé afetadu husi Coronavírus”, dehan Sekretáriu Estadu Julião liuhosi Konferénsia Imprensa ne’ebé maka hala’o iha Salaun SEPFOPE, Caicoli, sesta ne’e.

Nune’e, governante ne’e husu atu timoroan sira iha rai-li’ur tenke mantein kontaktu ho autoridade responsável sira.

“Ami hakarak husu ba sidadaun hotu favór ida  koordena no koopera hodi bele kontribui ba ita-nian Estadu no nasaun, tanba liuhosi dalan ilegál bele prejudika no estraga nasaun. Halo favór ida husu ita bo’ot sira-nia koopersaun ho Estadu, inklui ita-nian entidade ida-idak ne’ebé iha ita bo’ot sira-nian fatin, hamutuk ho Xefe Suku, Xefe Aldeia, Administradór Postu no Munisípiu, atu nune’e Governu bele halo atendimentu ruma ba sira”, nia akresenta.

Governante ne’e refere liután, kona-ba COVID-19, husu ba populasaun bainhira deskonfia hetan sintoma moras ne’e bele hatama ba karantina, tanba ita-nia Embaixada Korea no Adidu Traballu kontinua koordena no komunika ho traballadór sira.

Nia husu ba timoroan sira ne’ebé servisu iha rai-li’ur hanesan Korea no Austrália, tenke mai husi dalan legál, nune’e parte imigrasaun iha Aeroportu  no Fronteira Terrestre sira bele hatene.

“Husu ba públiku tomak se karik maka ita-nia família ne’ebé servisu iha ema-nia rai, fila tenke tuir prosesu legál ne’ebé maka iha, inklui kopera no komunika ho ita-nian sentru saúde ka fasilidade saúde ne’ebé maka besik tanba ita hotu hatene katak virus ne’e perigozu ba sidadaun hotu nian vida”, nia adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here